وادی کشمیر کے ضلع کولگام میں واقع معروف نالہ ویشو آہستہ آہستہ کوڈے دان میں تبدیل ہو رہا ہے۔ کولگام میں آباد بستیوں سے خارج ہونے والا کوڈا کرکٹ نالہ ویشو کے قریب پھینکا جا رہا ہے۔ مقامی میونسپلٹی اور محکمہ آبپاشی و پی ایچ ای اس پر خاموشی اختیار کیے ہوئے ہیں۔
کولگام کی بستیوں سے خارج ہونے والا ہزاروں ٹن کوڈا کرکٹ منظم طریقے سے ٹھکانے لگانے کے بجائے لرو کولگام میں واقع نالہ ویشو کے بلکل قریب پھینکا جا رہا ہے، جس کی وجہ سے نہ صرف نالہ ویشو غلاظت اور گندگی کے ڈھیر میں تبدیل ہو رہا ہے بلکہ کولگام کو سپلائی ہونے والا پینے کا پانی بھی متاثر ہو رہا ہے۔
سیاستدانوں اور متعلقہ ایجنسیوں نے ویسٹ منیجمنٹ پلانٹ اور کوڈا کرکٹ باضابطہ طور پر ڈمپ کرنے کی بات کی تاہم بعض وجوہات کی بنا پر اب تک یہ ممکن نہیں ہو پایا۔ نالے میں کوڑا پھینکنے سے نہ صرف یہ آلودہ ہو رہا ہے بلکہ لوگ بھی بیمار ہو رہے ہیں۔