کولگام کے مالون میں محکمہ بجلی کے خلاف احتجاج

جنوبی ضلع کولگام کے ملک پورہ مالون علاقے میں لوگوں کی شکایت ہے کہ بجلی ٹرانسفارمر خراب ہونے کی وجہ سے علاقے کی مقامی آبادی تین ماہ سے گھپ اندھیرے میں زندگی گزارنے پر مجبور ہے۔

تفصیلات کے مطابق مذکورہ علاقے کے لوگوں نے محکمہ بجلی کے خلاف احتجاج کرتے ہوئے کہا کہ رمضان کے مہینے میں بجلی ٹرانسفارمر خراب ہوا ہے جس کی مرمت کے لیے مقامی لوگوں نے کئی بار محکمہ بجلی کے دفتر کے چکر لگائے۔

مقامی لوگوں کے مطابق انہوں نے ٹرانسفارمر مرمت کے لیے راضاکارانہ طور پر چندہ جمع کر کے محکمہ کو دیے لیکن پھر بھی علاقہ 3 مہینوں سے بجلی سے محروم ہے۔

لوگوں نے کہا کہ محکمہ کی طرف سے انہیں بجلی بلز بھی دیے گئے مگر ستم ظریفی کا عالم یہ ہے کہ علاقے میں کئی مہینوں سے بجلی ٹرانسفارمر ہی نہں ہے تو بلز کیوں آئے۔

علاقے کے لوگوں نے ضلع انتظامیہ سے اپیل کی کہ جلد از جلد مذکورہ علاقے کا ٹرانسفارمر درست کیا جائے۔

انہوں نے ضلع انتظامیہ سے اپیل کی ہے کہ وہ جلد از جلد ان کے لیے 100 کے وی ٹرانسفارمر فراہم کیا جائے تاکہ بجلی کا نظام بحال ہو اور دیے گئے بجلی بلز کو بھی منسوخ کیا جائے۔