کولگام: زیارت شریف جانے والے راستے سے برف ہٹانے کا مطالبہ

وادی کشمیر میں قریب دو ہفتے قبل بھاری برفباری ہوئی تھی، اگرچہ بیشتر قصبہ جات اور اہم شاہراہوں پر سے انتظامیہ نے برف ہٹائی ہے تاہم وادی کشمیر کے متعدد مقامات خصوصا گلی کوچوں میں ابھی بھی برف کے انبار لگے ہوئے ہیں۔

قصبہ کولگام کے مین بازار سے زیارت شریف تک جانے والی اہم رابطہ سڑک سے برف ابھی تک نہیں ہٹائی گئی ہے جس سے زیارت جانے والے عقیدت مندوں کے علاوہ راہگیروں کو بھی مشکلات پیش آرہی ہیں۔

درجہ حرارت مسلسل نقطہ انجماد سے نیچے رہنے کے سبب کئی مقامات پر پھسلن پیدا ہو گئی ہے، جو مقامی آبادی کے لیے باعث پریشانی ہے۔

مقامی باشندوں نے ای ٹی وی بھارت کے ساتھ بات کرتے ہوئے کہا کہ روزانہ سینکڑوں عقیدت مند زیارتگاہ جاتے ہیں، تاہم راستے میں برف جمع ہونے سے انہیں دقتوں کا سامنا کرنا پڑ رہا ہے۔

انہوں نے مزید کہا علاقے میں ان دنوں پانی کی قلت کے سبب بعض اوقات باہر سے پانی لانا پڑتا ہے جو پھسلن کے سبب خطرناک ثابت ہو سکتا ہے۔

مقامی لوگوں نے انتظامیہ کو تنقید کا نشانہ بناتے ہوئے کہا کہ انہوں نے اس ضمن میں کئی بار ضلع انتظامیہ اور محکمہ میونسپلٹی سے رجوع کیا تاہم اب تک برف نہیں ہٹائی گئی۔

قصبہ کولگام میں زیارت شریف جیسی اہم جگہ کو جانے والے راستے پر اب تک برف کا جمع ہونا کولگام انتظامیہ کے دعووں اور سرکاری مشینری پر بھی سوالیہ نشان عائد کرتا ہے۔