ہانجی پورہ تصادم: دو عسکریت پسند ہلاک

جنوبی ضلع کولگام کے ہانجی پورہ علاقے کے منزگام گاؤں میں ہونے والے تصادم میں دو عسکریت پسندوں کے ہلاک ہونے کی اطلاع ہے۔

اطلاعات کے مطابق عسکریت پسندوں کی موجودگی کی خفیہ اطلاع ملنے کے بعد سیکیورٹی فورسز نے ہانجی پورہ کے منز گام گاؤں کو محاصرے میں لیا اور تلاشی کاروائی شروع کی، تلاشی کاروائی کے دوران عسکریت پسندوں نے فائرنگ کی، جس کے بعد طرفین تصادم شروع ہوا۔

سرکاری ذرائع نے بتایا کہ تصادم میں دو عسکریت پسند ہلاک ہوئے ہیں۔ انہوں نے بتایا کہ عسکریت پسندوں کی شناخت ابھی ہونا باقی ہے اور آپریشن جاری ہے۔

سرکاری ذرائع نے بتایا کہ آپریشن ٹیم نے پھنسے عسکریت پسندوں کو سرینڈر کرنے کو کہا تھا لیکن انہوں نے سرینڈر کی پیشکش کا جواب گولیوں سے دینا شروع کیا جس کے نتیجے میں طرفین کے درمیان تصادم چھڑ گیا۔

ذرائع نے بتایا کہ حکام نے احتیاطی طور پر ضلع میں موبائل انٹرنیٹ خدمات معطل کردی ہیں۔