کولگام: ہلاک شدہ عسکریت پسند کی ماں گرفتار
13:07 June 28
23:45 June 27
جنوبی کشمیر کے ضلع کولگام میں رام پورہ سے تعلق رکھنے والے عسکریت پسند توصیف شیخ جو 2018 میں صدام پڈر، ڈاکٹر رفیق اور اپنے دیگر دو ساتھیوں کے ساتھ شوپیاں میں ایک انکاونٹر میں ہلاک ہوئے تھے تب سے ان کے گھر پر سکیورٹی فورسز کی جانب سے چھاپہ ماری کا سلسلہ جا ری ہے۔
مقامی ذرائع کے مطابق توصیف شیخ کے گھر پر گزشتہ دنوں سکیورٹی فورسز کی جانب سے چھاپہ مارا گیا تھا اور وہ ان کی بہن رفیقہ کو گرفتار کرنے کی غرض سے آئے تھے لیکن رفیقہ سکیورٹی فورسز کو چکمہ دے کر فرار ہو گئی۔ وہیں ان کی والدہ نسیمہ کو گرفتار کیا گیا۔
کولگام کے ایس ایس پی گوریندر پال سنگھ نے اس بات کی تصدیق کی کہ عسکریت پسند توصیف شیخ کی والدہ کے خلاف 2018 میں ایک کیس درج کیا گیا تھا اور اُنہیں گرفتار کیا گیا ہے۔
انہوں نے بتایا کہ 'اس کے علاوہ ان کے بیٹے کی موت کے بعد ان کا اور رفیقہ کا نوجوانوں کو عسکریت پسندوں کی صف میں شامل کرنے، اسلحہ اور گولہ بارود کی فراہمی کرنے کے ساتھ ساتھ ان کو چھپانے میں براہ راست کردار رہا ہے۔'