Grenade Throwing Case کولگام گرینیڈ حملے میں ملوث چار عسکریت پسند معاونین اسلحہ سمیت گرفتار،پولیس

سکیورٹی فورسز نے کولگام کے یاری پورہ میں چوک میں 24 مئی 2022 کو ایک گرینیڈ حملہ کرنے میں ملوث چار عسکریت پسند معاونین کو گرفتار کرنے کا دعوی کیا ہے۔ واضح رہے کہ اس گرینڈ حملے میں 13 افراد زخمی ہوئے تھے۔

کولگام: جنوبی ضلع کولگام میں سکیورٹی فورسز نے گرینیڈ حملے میں ملوث چار عسکریت پسند معاونین کی گرفتاری عمل میں لاکر ان کے قبضے سے اسلحہ برآمد کرکے ضبط کیا۔

پولیس کے ایک ترجمان نے بتایا کہ 24مئی 2022 کو یاری پورہ مین چوک میں پولیس پارٹی پر گرینیڈ سے حملہ کیا گیا تاہم نشانہ چوک جانے کے باعث گرینیڈ لوگوں کی بھیڑ میں زور دار دھماکہ کے ساتھ پھٹ گیا جس کے نتیجے میں 13 عام شہری زخمی ہوئے ۔انہوں نے بتایا کہ پولیس نے اس سلسلے میں کیس درج کرکے تحقیقات شروع کی۔

انہوں نے مزید بتایا کہ تفتیش کے دوران کولگام پولیس اور فسٹ آر آر نے مشترکہ آپریشن کے دوران چار عسکریت پسند معاونین جن کی شناخت ناصر نبی ڈار ولد غلام نبی ڈار ساکن گنڈ چہل فرسل ، عاقب مجید گنائی ولد عبدالمجید گنائی ساکن بڈرو یاری پورہ ، محمد عباس ڈار ولد عبدالغنی ڈار ساکن گنڈ چھل فرسل اور زاہد احمد بٹ ولد علی محمد بٹ ساکن کوکر گنڈ یاری پورہ کے بطور ہوئی ہے کی گرفتاری عمل میں لائی۔

موصوف ترجمان نے بتایا کہ تحقیقات کے دوران گرفتار شدگان کے گرینیڈ حملے میں ملوث ہونے کے بارے میں پتہ چلا ہے۔پولیس نے گرفتار شدگان کے قبضے سے ایک پستول ، دو پستول میگزین، ایک گرینیڈ ، چودہ پستول گولیوں کے راونڈ برآمد کرکے ضبط کئے ہیں۔

(یو این آئی)