کولگام میں لاوارث بیگ سے مردہ بھیڑ برآمد

کولگام میں سرینگر - جموں شاہراہ پر لاوارث بیگ پائے جانے کے بعد سراسیمگی پھیل گئی تاہم بیگ سے مردہ بھیڑ برآمد کی گئی ہے۔

جنوبی کشمیر کے ضلع کولگام میں شاہراہ پر خون میں لت پت بیگ ملنے سے سراسیمگی پھیل گئی۔ اس کی وجہ سے شاہراہ پر کچھ دیر کے لئے ٹریفک کی نقل وحرکت مسدود ہو کر رہ گئی۔

سبحان پورہ، قیموہ کے نزدیک سرینگر - جموں شاہراہ پر لوگوں میں اُس وقت خوف و ہراس پھیل گیا جب خون سے لت پت ایک بیگ لاوارث حالت میں پایا گیا۔

کولگام پولیس اور فورسز اہلکار جائے موقع پر پہنچے اور شاہراہ پر ٹریفک کی نقل و حرکت روک دی۔ بعد میں بم ڈسپوزل اسکواڈ جائے موقع پر پہنچا۔ بیگ کو چیک کرنے کے بعد معلوم ہوا کہ اس میں مردہ بھیڑ رکھی گئی ہے۔

پولیس کا گمان ہے کہ اس بیگ کو یہاں کسی ٹرک ڈرائیور نے پھنک دیا ہوگا۔