ATM Robbery Attempt: کولگام میں اے ٹی ایم کی توڑ پھوڑ

ضلع کولگام میں دوران شب نقب زنوں نے اے ٹی ایم سے نقدی اڑانے کی کوشش کی جس میں وہ ناکام رہے۔ پولیس نے معاملہ درج کرکے نقب زنوں کی تلاش شروع کر دی ہے۔ ATM Robbery Attempt in South Kashmir

کولگام:جنوبی کشمیر کے کولگام ضلع میں نقب زنوں نے دوران شب اے ٹی ایم کی توڑ پھوڑ کی تاہم وہ کوئی بھی رقم اڑانے میں ناکام رہے۔ موصولہ اطلاعات کے مطابق ضلع کے چولگام علاقے میں نامعلوم افراد نے پیر اور منگل کی درمیانی شب ضلع کے چولگام علاقے میں موجود جموں اینڈ کشمیر بینک کی آٹومیٹڈ ٹیلر مشین (اے ٹی ایم) کی توڑ پھوڑ کی۔

حکام کا کہنا ہے کہ نقب زنوں نے اے ٹی ایم سے رقم اڑانے کی جی توڑ کوشش کی اور اے ٹی ایم مشین کو کافی نقصان پہنچایا تاہم وہ اس میں سے رقم نکالنے میں ناکام رہے۔ انہوں نے کہا کہ اے ٹی ایم میں کتنی نقدی ہے وہ فوری طور پر معلوم نہ ہو سکا تاہم پولیس نے اس میں معاملہ درج کرکے نقب زنوں کی تلاش شروع کر دی ہے۔

ایس ایس پی کولگام، ساحل سرنگل، نے بتایا کہ ’’چوروں نے جی توڑ کوشش کی لیکن وہ رقم چوری کرنے میں ناکام رہے اور اے ٹی ایم میں موجود رقم محفوظ ہے۔‘‘ ایس ایس پی نے بتایا کہ پولیس نے معاملہ کا نوٹس لے لیا اور لٹیروں، نقب زنوں کو ڈھونڈ نکالنے کے لیے ثبوت جمع کیے جا رہے ہیں۔

وادی کشمیر میں اس سے پہلے بھی اے ٹی ایم میں چوری کی واردات پیش آچکے ہیں کئی مقامات پر تو چوروں نے اے ٹی ایم مشین ہی کی چوری کی اور اس کو اکھاڑ کر لے گئے اور کئی مقامات پر اے ٹی ایم میشن میں توڑ پھوڑ کرکے چوری کی گئی تھی۔