کشتواڑ میں نوراتری اور بیساکھی کا تہوار منایا گیا

کورونا وبا کی وجہ سے اس بار نوراتری کے موقع پر بھنڈارکوٹ گنگامیا کے مندر میں اور کشتواڑ کے دیگر مندروں میں لوگوں کی کم تعداد دیکھنے کو ملی۔

پورے جموں و کشمیر کے ساتھ ساتھ ضلع کشتواڑ میں بھی آج نوراتری اور بیساکھی کا تہوار منایا گیا۔ کشتواڑ کے بھنڈارکوٹ میں واقع گنگا ماتا مندر میں عقیدت مندوں کے آنے کا سلسلہ صبح سے ہی جاری تھا۔ تاہم اس بار کورونا وبا کی وجہ سے عقیدت مند پہلے سے کم دکھائی دیے۔

عقیدت مندوں نے کہا 'کورونا وبا کی وجہ سے اس بار مندروں میں پہلے جیسی بھیڑ نہیں ہے۔ مندروں میں خصوصی بھجن، کیرتن، پرارتھنا کی گئی تاکہ جلد از جلد پوری دنیا سے کورونا وائرس کا خاتمہ ہو'۔

اس دوران مندر کمیٹی کے ممبر راجیش شرما نے بتایا 'کورونا گائیڈ لائنز کو مد نظر رکھتے ہوئے بیساکھی کا تہوار عقیدت سے منایا گیا اور آج نوراتری کے پہلے دن مندروں میں بھی پوجا کی گئی اور بھگوان سے پرارتھنا کی گئی کہ کورونا وائرس سے ہمارے ملک کو نجات ملے'۔