کشتواڑ: مسروقہ مال ضبط، نقب زن گرفتار

کشتواڑ پولیس نے نقب زنی میں استعمال ہونے والے اوزار اور مسروقہ مال سمیت نقب زن کو گرفتار کر لیا ہے۔

پہاڑی ضلع کشتواڑ میں ایک مقامی باشندے کی جانب سے نقب زنی کی شکایت درج کرنے کے بعد کشتواڑ پولیس نے کارروائی کرتے ہوئے مسروقہ مال سمیت نقب زن کو گرفتار کرنے کا دعویٰ کیا۔

کشتواڑ میں پریس کانفرنس کے دوران خطاب کرتے ہوئے ڈی وائی ایس پی، ہیڈکوارٹرز نے بتایا کہ نقب زنی کی شکایات موصول ہونے کے بعد پولیس نے قریب 40 افراد سے پوچھ گچھ کی۔

انہوں نے کہا کہ پولیس نے سی سی ٹی وی فوٹیج سمیت دیگر ثبوتوں کی بنیات پر چیتک شرما ولد شیو راج شرما ساکن دوڑی، سرتھل کو حراست میں لے کر پوچھ تاچھ شروع کی تو چیتک شرما نے نقب زنی کا اعتراف کیا۔

پولیس کے مطابق ملزم کے قبضے سے ہزاروں روپے مالیت کا زعفران اور نقد رقم سمیت ایک موٹر سائیکل بھی ضبط کی گئی ہے۔

کشتواڑ پولیس نے مزید کہا کہ چیتک شرما کی تحویل سے نقب زنی میں استعمال ہونے والے اوزار بھی پولیس نے ضبط کر لیے۔

کشتواڑ پولیس نے اس ضمن میں ایف آئی آر نمبر 226/2021 زیر دفعہ 457/380IPC درج کرکے میزید تفتیش شروع کر دی ہے۔