کشتواڑ: ماسک نہ پہننے کی پاداش میں 635 افراد پر جرمانہ

پہاڑی ضلع کشتواڑ میں جموں و کشمیر پولیس نے ماسک نہ پہننے کی پاداش میں 635 لوگوں پر جرمانہ عائد کیا۔

جموں و کشمیر کے پہاڑی ضلع کشتواڑ میں بھی دیگر اضلاع کی طرح لاک ڈاؤن میں نرمی کے ساتھ ہی تجارتی سرگرمیاں بحال ہو گئی ہیں۔ وہیں، انتظامیہ کی جانب سے لوگوں کو کرونا ایس او پیز پر سختی سے عمل کیے جانے کی تلقین کی جا رہی ہے۔

کشتواڑ پولیس نے ایس او پیز کی خلاف ورزی کرنے والوں کے خلاف کارروائی کرتے ہوئے ماسک نہ پہننے والے افراد پر جرمانہ عائد کیا۔

ایڈیشنل ایس پی کشتواڑ نے تفصیلات فراہم کرتے ہوئے کہا کہ ماسک نہ پہننے والے 635 دکانداروں، ڈراوئیوروں اور راہگیروں سے جرمانہ وصول کیا گیا۔

انہوں نے عوام سے ایس او پیز پر سختی سے عمل کرنے کی تاکید کرتے ہوئے کہا کہ ’’کورونا وائرس ابھی ختم نہیں ہوا ہے، لوگوں کو چاہیے کہ وضع کیے گئے رہنما خطوط پر سختی سے عمل کریں۔‘‘

انہوں نے عوام سے ماسک پہننے اور بھیڑ بھاڑ سے پرہیز کرنے کی تلقین کرتے ہوئے کورونا وبا کو مزید پھیلنے سے روکنے کے لیے کلیدی کردار ادا کرنے کی اپیل کی۔