کنور: کیرالہ کے کننور شہر میں جمعرات کو ایک کار میں آگ لگنے سے ایک آٹھ ماہ کی حاملہ خاتون سمیت دو افراد جھلس کر ہلاک ہو گئے۔ پولیس نے یہ اطلاع دی۔ پولیس نے بتایا کہ متوفیہ کے چار دیگر قریبی رشتہ دار اس حادثے میں بال بال بچ گئے۔ کار میں سوار چھ افراد خاندان کی حاملہ خاتون کو کٹیاٹور سے معمول کے طبی معائنے کے لیے ضلع اسپتال لے جا رہے تھے۔پولیس کے مطابق مہلوکین کی شناخت بلڈنگ کنٹریکٹر پرجیت (32) اور اس کی بیوی ریشا (26) کے طور پر ہوئی ہے۔ دونوں ضلع کے مائیل کے قریب کٹیاٹور کے رہنے والے تھے۔
پولیس نے بتایا کہ یہ واقعہ صبح تقریباً 10.45 بجے پیش آیا۔ جب کار ضلع اسپتال کی طرف جارہی تھی اسی دوران کار میں آگ لگ گئی۔ سیٹ بیلٹ کے باعث پرجیت اور ریشا کار سے اترنہیں سکے۔ جبکہ ریشا کے والدین وشواناتھن، سوبھا، اس کی بہن سجنا اور متوفی جوڑے کی بیٹی سری پاروتی (7) کارکا پچھلا دروازہ کھول کر کود گئے۔فائر ڈیپارٹمنٹ کے ذرائع نے بتایا کہ فائر بریگیڈ کے عملے نے موقع پر پہنچ کر آگ پر قابو پالیا تاہم جوڑے کی موقع پر ہی موت ہو گئی۔ ذرائع کا کہنا ہے کہ ابتدائی طور پر گاڑی میں آگ لگنے کی وجہ شارٹ سرکٹ بتائی جا رہی ہے۔ ساتھ ہی پولیس کا کہنا ہے کہ وجوہات فرانزک تحقیقات کے بعد ہی سامنے آئیں گی۔