ترواننت پورم:وزیر اعظم نریندر مودی نے اتوار کی شام کیرالہ کے ملاپورم میں کشتی حادثے میں ہلاک ہونے والوں کے لواحقین کو دو دو لاکھ روپے معاوضہ دینے کا اعلان کیا۔ وزیر اعظم نریندر مودی نے ٹویٹ کیا 'کیرالہ کے ملاپورم میں کشتی حادثے میں لوگوں کی موت سے غم زدہ ہوں۔ سوگوار خاندانوں سے تعزیت۔ وزیر اعظم ریلیف فنڈ ( پی ایم این آر ایف) سے ہر مرنے والے کے لواحقین کو دو دو لاکھ روپے کی ایکس گریشیا فراہم کی جائے گی۔‘‘ اس دوران کیرالہ کے وزیر اعلیٰ پنارائی وجین نے بھی کشتی حادثے میں ہلاک ہونے والوں کی موت پر تعزیت کی اور کہا کہ وہ پیر کو جائے حادثہ کا دورہ کریں گے اور سوگوار خاندانوں سے ملاقات کریں گے۔
واضح رہے کہ اتوار کی رات ملاپورم کے تانور میں سیاحوں کی کشتی الٹنے سے پانچ بچوں سمیت کم از کم 22 افراد کی موت ہو گئی۔ کشتی میں 25 سے زائد سیاح سوار تھے۔ واقعہ کی اطلاع ملتے ہی کئی گاڑیاں موقع پر پہنچ گئیں اور امدادی کارروائیاں شروع کر دیں۔ دریں اثنا، کیرالہ کی وزیر صحت وینا جارج نے واقعے کے بعد آدھی رات کو ریاستی محکمہ صحت کی ہنگامی میٹنگ بلائی اور حکام کو زخمیوں کے بہتر علاج کو یقینی بنانے کی ہدایت کی۔ اس حادثے میں ہلاک ہونے والوں میں خواتین اور بچے بھی شامل ہیں۔ وہیں زخمیوں کو پارپننگڈی، تھنور، ترور اور ترورنگاڈی کے ہسپتالوں میں داخل کرایا گیا ہے۔ پولیس نے بتایا کہ کئی ایمبولینس، فائر سروس کے اہلکاروں اور رضاکاروں کے ساتھ ریسکیو آپریشن جاری ہے۔