طیارہ حادثہ: 'بچاؤ مہم میں شامل اہلکار خود کو قرنطینہ کرلیں'

کیرالہ کی وزیر صحت کے کے شیلجا نے ہفتے کے روز کری پور کے کالی کٹ بین الاقوامی ہوائی اڈے پر ائیر انڈیا ایکسپریس طیارے کے حادثے کے بعد بچاؤ کاموں میں مصروف رضاکاروں اور دیگر افراد سے اپیل کی ہے کہ وہ تمام کورونا وائرس کے پیش نظر کوارنٹائن کے عمل سے گزریں کیونکہ اسے پہلے ہی کنٹینمنٹ ژون کے طور پر اعلان کیا جاچکا ہے۔

یہاں جاری ایک ریلیزمیں محترمہ شیلجہ نے بتایا کہ جمعہ کی شام طیارہ حادثے کی اطلاع کے بعد لوگوں کی ایک بڑی تعداد حادثے کے مقام پر پہنچی اور وہ بچاؤ اور امدادی کاموں میں مصروف ہوگئی۔

ایسی صورت میں کووڈ پروٹوکول پر عمل نہیں کیا جاسکا تھا۔محکمہ صحت وندے بھارت مشن کے تحت دبئی سے یہاں آئے مسافروں کی کووڈ ٹیسٹ کی رپورٹ کا انتظار کر رہا ہے۔ ایک مسافر کی کورونا رپورٹ مثبت آنے کے بعد، دیگر ہلاک شدگان کی رپورٹ کا انتظار کیا جارہا ہے۔

واضح رہے کہ گذشتہ رات کری پور میں کالی کٹ انٹرنیشنل ایئرپورٹ پر ایئر انڈیا ایکسپریس طیارے کے حادثے میں جاں بحق ہونے والے 18 افراد میں سے ایک مسافر کی رپورٹ کورونا پازیٹیو آئی تھی۔ کیرالہ کے اعلی تعلیم کے وزیر کے ٹی جلیل نے بتایا کہ مسافر کی شناخت سدھیر ویریات کے طور پر کی گئی ہے جو طیارے میں سوار تھا اور اس کی رپورٹ مثبت آئی ہے۔

مسٹر جلیل نے بتایا کہ ان کی لاش کو ایم آئی ایم ایس اسپتال میں رکھا گیا ہے۔وزیر صحت نے کری پور ہوائی اڈے پر بچاؤ اور امدادی کاموں میں مصروف تمام رضاکاروں اور اہلکاروں کو مشورہ دیا کہ وہ کوارنٹائن کے عمل سے گزریں۔

انہوں نے کہا کہ وہ تمام افراد جو ریسکیو مشن میں شامل ہیں وہ سھی 1056، 047125520560، 04832733251، 2733252، 2733253، 04952376063، 2371471، 2373901 پر محکمہ صحت کے ہیلپ لائن نمبر پر رابطہ کریں اور اپنی مکمل تفصیلات پیش کریں۔