Shells Recovered in Kathua: بھارت پاک سرحد کے نزدیک دو شیل برآمد

صوبہ جموں کے کٹھوعہ ضلع میں کھیتوں میں برآمد کیے گئے دو شیل (جو پھٹنے سے رہ گئے تھے) کو سیکوٹی اہلکاروں نے ناکارہ بنا دیا۔

سرینگر (جموں و کشمیر):یونین ٹیریٹری جموں و کشمیر کے ضلع کٹھوعہ میں بھارت پاکستان سرحد کے نزدیک جمعہ کے روز دو موٹر شیل بر آمد کیے گئے۔ حفاظتی اہلکاروں کی ٹیم نے موقع پر پہنچ کر دونوں شیلز کو ناکارہ بنا دیا۔ اس حوالہ سے ای ٹی وی بھارت کے ساتھ بات کرتے ہوئے جموں و کشمیر پولیس کے ایک سینئر افسر نے بتایا کہ’’جمعہ کی صبح جموں و کشمیر پولیس کو اطلاع موصول ہوئی کہ بھارت پاکستان سرحد کے نزدی ہیرا نگار سیکٹر (کٹھوعہ) میں ایک کسان نے اپنے کھیت میں کام کے دوران دو شیل دیکھے جس کے بعد انہوں نے پولیس کو مطلع کیا۔‘‘

پولیس افسر کا مزید کہنا تھا کہ ’’اطلاع موصول ہوتے ہی پولیس ٹیم موقع پر پہنچی اور ایس او پیز کے تحت کارروائی شروع کر دی۔‘‘ انہوں نے مزید کہا کہ اطلاع دینے والے کسان نے بتایا کہ کھیت میں کام کرنے کے دوران انہوں نے زمین کے اندر دھنسے کچھ دھاتی مواد کو دیکھ کر فوری طور پر پولیس کو مطلع کیا۔ پولیس اہلکاروں نے ایس او پی کے مطابق بی ایس ایف کو اطلاع دی جن کی ماہر ٹیم نے دونوں شیل ناکارہ بنا دئے۔

واضح رہے کہ رواں مہینے کی 27 تاریخ کو جموں و کشمیر پولیس کے ڈائریکٹر جنرل دلباغ سنگھ کٹھوعہ علاقے کے دورے پر گئے تھے۔ انہوں نے وہاں ایک پولیس اسٹیشن اور ایس ڈی پی او آفس کا افتتاح بھی کیا تھا۔ اس موقع پر صحافیوں سے بات کرتے ہوئے سنگھ نے دعویٰ کیا تھا عسکریت پسندی اور ناکو ٹیررزم کے خلاف پولیس سختی سے نمٹ رہی ہے۔ انہوں نے مزید یہ بھی کہا تھا کہ جموں و کشمیر میں عسکریت پسندی آخری سانسیں لے رہی ہیں جبکہ عسکریت پسند تنظیمیں بشمول حزب المجاہدین، جیش اور لشکر طیبہ بغیر قیادت کے ہی کام کر رہی ہیں۔ یہ تنظیمیں پاک ہیلڈلز کے اشاروں پر یو ٹی میں امن و امان کے ماحول کو خراب کرنے کی کوششیں کر رہی ہیں جبکہ پولیس دیگر سیکورٹی ایجنسیز کے ہمراہ ان کے ارادوں کو ناکام بنا رہی ہیں۔