کرناٹک کے یادگیر میں بھی مختلف علمائے کرام نے وسیم رضوی کی حرکت کو شرمناک قرار دیا۔ مولانا محمد ابراہیم رضا شاہ پور تعلقہ نے ای ٹی وی بھارت سے بات کرتے ہوئے شیعہ وقف بورڈ کے سابق چیئرمین وسیم رضوی پر سخت تنقید کی اور قرآن سے متعلق وسیم رضوی کے بیان کی پرزور مذمت کی۔
انہوں نے کہا کہ وسیم رضوی کو معلوم ہونا چاہیے کہ جس کسی نے بھی قرآن کی بے حرمتی کی ہے اس کا کیا انجام ہوا ہے۔
مولانا جلال الدین شاہ پور نے کہا کہ قرآن مجید ایک آسمانی کتاب ہے جبکہ اس میں کسی قسم کی کوئی تبدیلی کرنے کی اجازت نہ پہلے تھی اور نہ ہی تاقیامت تک کسی کو ہوگی۔ انہوں نے وسیم رضوی کو فوری طور پر گرفتار کرنے کا حکومت سے مطالبہ کیا۔
مولانا عبدالقدیر عطاری مبلغ سنی دعوت اسلامی نے کہا کہ قیامت تک قرآن کریم میں زیر و زبر کی بھی تبدیلی کی گنجائش نہیں ہے جبکہ اس میں تبدیلی و منسوخی کا مطالبہ کرنا فتنہ ہے۔
انہوں نے کہا کہ اس طرح کی باتوں سے ملک کی امن و یکجہتی کو خطرہ ہوسکتا ہے۔ مولانا نے وسیم رضوی کے خلاف سخت کاروائی کرنے کا مطالبہ کیا۔
