یادگیر: تریپورہ تشدد اور مساجد پر حملوں کے خلاف مظاہرہ

مظاہرین نے مرکزی حکومت سے مطالبہ کیا کہ تریپورہ میں مسلمانوں پر تشدد اور مساجد پر حملہ کرنے والوں کے خلاف سخت سے سخت کارروائی کی جائے۔

کرناٹک کے ضلع یادگیر کے تعلقہ شاہ پور میں سوشل ڈیموکریٹک پارٹی آف انڈیا کی جانب سے احتجاجی مظاہرہ کیا گیا جس کی نگرانی سوشل ڈیموکریٹک پارٹی آف انڈیا یادگیر یونٹ کے صدر بندہ نواز نے کی۔

یہ احتجاج تریپورہ میں مسلمانوں کے خلاف ہو رہے تشدد کے خلاف کیا گیا۔ اس موقع پر مولانا مجیب اسد سابق نائب صدر سوشل ڈیموکریٹک پارٹی آف انڈیا شاخ یادگیر نے کہا کہ تریپورہ میں مسلمانوں پر ہو رہے تشدد کے خلاف احتجاج میں خود مسلمانوں کی عدم شرکت نہایت افسوس اور تعجب کی بات ہے۔

انہوں نے مرکزی حکومت سے اپیل کرتے ہوئے کہا کہ مسلمانوں کا قتل اور مساجد کو مسمار کرنے والوں کے خلاف سخت سے سخت کارروائی کی جائے۔

اس اجلاس میں دیگر تنظیموں کے ذمہ داران نے بھی شرکت کرکے اپنے خیالات کا اظہار کیا۔

اس موقع پر سوشل ڈیموکرٹک پارٹی آف انڈیا کے دیگر ارکان بھی موجود تھے۔