گلبرگہ شہر میں ویلفیئر پارٹی آف انڈیا کے جانب سے بی جے پی کی قیادت والی مرکزی و ریاستی حکومت کی جانب سے بنائے گئے مخالف کسان و مزدور قوانین کے خلاف جگت سرکل پر ایک روزہ احتجاجی دھرنا منظم کیا گیا۔
اس موقع پر ویلفیئر پارٹی آف انڈیا کے ریاستی صدر ایڈوکیٹ طاہر حسین نے کہاکہ بی جے پی حکومت من مانی کر رہی ہے۔ گذشتہ 56 دنوں سے ملک کے کسان احتجاج کر رہے ہیں لیکن مرکزی حکومت اپنی ضد پر اٹل ہے۔ کسانوں کے مسائل حل کر نے کے بجائے انہیں ڈرانے اور دھمکانے کی کوشش کی جارہی ہے تاکہ احتجاج کو ختم کیا جاسکے۔
انہوں نے کہا کہ احتجاج کے دوران کئی کسان ہلاک ہوچکے ہیں لیکن زرعی قوانین کو منسوخ نہیں کیا جارہا ہے۔ بی جے پی حکومت کسان کو اپنا غلام بنانے کی کوشش کر رہی ہے۔ انہوں نے کرناٹک میں لینڈ ریفام ایکٹ اور انسداد گئوکشی قانون کے خلاف بھی احتجاج کیا۔ انہوں نے مزید کہا کہ ایسے قوانین کے ذریعہ کسان، مسلمان اور دلتوں کو پریشان کرنے کی کوشش کی جارہی ہے۔