لاک ڈاؤن سے متاثر طلبہ کے تعلیمی لون معاف کیے جائیں: ویلفیئر پارٹی

کورونا وائرس کی وبا اور لاک ڈاؤن کی وجہ سے معاشرے کے تمام شعبے متاثر ہیں۔ وہیں، تعلیمی شعبہ میں نہ صرف طلبہ بلکہ اساتذہ بھی بری طرح سے متاثر ہیں۔ ان پریشان کن حالات میں مختلف درخواستیں سامنے آئی ہیں کہ ایسے طلبا جنہوں نے ایجوکیشن لون لیے ہیں انہیں قرض لوٹانے کے لیے بینکس کی جانب سے ہراساں کیا جارہا ہے۔

اس سلسلے میں ویلفیئر پارٹی کرناٹک کے صدر ایڈووکیٹ طاہر حسین نے بتایا کہ پارٹی کی جانب سے حکومت کرناٹک کو ایک میمورنڈم دے کرکے مانگ کی گئی کہ وباء و لاک ڈاؤن سے متاثر طلباء کے ایجوکیشنل لونز کو معاف کیا جائے۔

ایڈووکیٹ طاہر حسین نے حکومت سے کہا کہ جس طرح کووڈ و لاک ڈاؤن سے پریشان مزدوروں کے لئے پیکیج کا اعلان کیا گیا ہے، اسی طرز پر طلباء کے لئے بھی پیکیج کی تشکیل دی جائے تاکہ مجبور طلباء کی کچھ حد تک امداد ہوسکے اور ان کی تعلیم کسی بھی اعتبار سے منقطع نہ ہو۔

یاد رہے کہ گزشتہ تقریباً 3 ماہ سے ریاست کرناٹک میں کووڈ کی وباء کی وجہ سے سخت لاک ڈاؤن کا نفاذ کیا گیا تھا، جس کے نتیجے میں آبادی کا ایک بڑا حصہ روزگار سے دور ہوچکا جس کی وجہ سے معاشی کمزوری لاحق ہوئی ہے۔