'کامیاب زندگی گزارنے کے لئے صبر و تحمل سے کام لینے کی ضرورت'

بسواکلیان میں واقع سبھا بھون میں منعقدہ قرآن پروچن کو خطاب کرتے ہوئے اسلامی مبلغ محمد کنہی نے کہاکہ کامیاب زندگی گزارنے کے لئے صبر وتحمل سے کام لینے کی ضرورت ہے۔قرآن شریف میں ہمیں اسلامی طور طریقے سے زندگی گزارنے کا درس دیتا ہے۔

بسواکلیان: ریاست کرناٹک کے بسواکلیان میں واقع سبھا بھون میں منعقدہ قرآن پروچن کو خطاب کرتے ہوئے اسلامی مبلغ محمد کنہی نے اپنی 60 منٹوں کی طویل تقریر میں کہاکہ انسانوں نے کامیاب زندگی گزارنے کے اپنے اپنے طریقے اختیار کرلئے ہیں لیکن ان طریقوں کی کامیابی کی کوئی ضمانت نہیں ہے۔ صرف قرآن مجید کے اصول کامیاب زندگی گذارنے کیلئے ضامن ہوسکتے ہیں۔

محمد کنہی نے کامیاب زندگی گذارنے کے قرآنی تصور کو نہایت جامع اور متاثر کن پیرایے میں بیان کیا انہوں نے قرآن مجید کی متعدد آیات کے حوالے سے بتایا کہ انسان محرومیوں پر صبر کرتے ہوئے اور نعمتوں پر شکر ادا کرتے ہوئے کامیاب اور پرسکون زندگی بسر کرسکتا ہے۔محمد کنہی نے مزید کہا کہ موت زندگی کی تلخ حقیقت ہے اور چاہے طاقتور ترین بادشاہ ہو کہ دولتمند یا پھر عام انسان کوئی موت سے نہیں بچ سکتاہے، انسانوں نے سائنس اور ٹیکنالوجی کی ترقی سے روبوٹ اور سینسر تو بنالئے لیکن موت سے بچنے کی کوئی تکنیک ایجاد نہیں کرسکا کیونکہ موت سے بچنا انسان کے اختیار میں نہیں ہے۔

انہوں نے کہا کہ پیغمبر اسلام نے نصیحت فرمائی ہے کہ زندگی میں دنیاوی لحاظ سے اس شخص کی طرف دیکھنا چاہیئے جو تم سے نیچے ہے ۔مذہبی لحاظ سے اس شخص کی طرف دیکھنا چاہیئے جو امور خیر میں تم سے بڑھ کر ہے۔ محمد کنہی نے مزید کہا کہ کامیاب ترین زندگی بسر کرنے کیلئے ضروری ہے کہ انسان خواہشات کا غلام نہ بن جائے کیونکہ انسان ختم ہوجاتا ہے لیکن خواہشات ختم نہیں ہوتے خواہشات ہر دور میں بدلتے رہتے ہیں۔

ایک اندازے کے مطابق 12 ہزار برادران وطن نے قرآن پروچن میں شرکت کی۔ قرآن پروچن کے تینوں ایام میں برادران وطن سے سبھا بھون کا وسیع وعریض اندرونی و بیرونی احاطہ کچھا کھچ بھرا رہا۔ قرآن پروچن کو کامیاب بنانے کیلئے مجاہد پاشاہ قریشی ،صدر استقبالیہ کمیٹی اسلم جناب، امیر مقامی جماعت اسلامی تحسین علی جمعدار رکن استقبالیہ کمیٹی کی زیر نگرانی جماعت اسلامی ہند شاخ بسواکلیان جی آئی او کے عہدیداران و اراکین اور استقبالیہ کمیٹی کے ذمہ داران نے اہم رول ادا کیا۔