کرناٹک: تین کشمیری طلباء پھر سے عدالتی تحویل میں

ریاست کرناٹک کے ضلع ہبلی میں تین کشمیری طلباء کو ملک سے غداری کے معاملے میں آج عدالت میں پیش کیا گیا جس کے بعد انہیں 2 مارچ تک عدالتی تحویل میں بھیج دیا گیا ہے۔

واضح رہے کہ گزشتہ روز پولیس نے تین کشمیری طلباء کو سی آر پی سی کے سیکشن 169 کے تحت بانڈ پر دستخط کے بعد رہا کیا تھا۔ لیکن طلباء کی رہائی کے خلاف ضلع ہبلی میں ہندو تنظیموں کے کچھ وکلاء اور کارکنوں نے احتجاج کیا تھا۔ اس کے بعد پولیس نے تینوں طلباء کو دیر رات دوبارہ گرفتار کر لیا اور آج انہیں ہبلی عدالت میں پیش کیا۔

پولیس کے مطابق ان تینوں طلباء نے پلوامہ حملے کی پہلی برسی کے موقع پر ایک ویڈیو بنایا تھا جس میں وہ مبینہ طور پر 'پاکستان زندہ باد'، 'ہم آزادی چاہتے ہیں' اور 'فری کشمیر' کے نعرے لگا رہے ہیں'۔ ویڈیو وائرل ہونے کے بعد پولیس نے تینوں طلباءکو گرفتار کیا تھا۔

پولیس نے بتایا کہ ابتدائی تحقیقات میں پتہ چلا کہ ان تینوں کا تعلق جموں و کشمیر کے ضلع شوپیاں سے ہے۔ پرنسپل کی طرف سے دائر کردہ شکایت پر ان کے خلاف آئی پی سی کی دفعہ 153 اے بی اور 124 اے کے تحت مقدمہ درج کیا گیا ہے۔

گرفتار شدہ تینوں طلباء کرناٹک کے ہبلی شہر کے ایک نجینئرنگ کالج کے زیر تعلیم ہیں۔ طلباء کی شناخت عامر، طالب اور باسط کے طور پر ہوئی ہے۔