موسمی امراض کے تعلق سے سروے کیا جائے گا

ریاست کرناٹک ضلع بیدر کے ڈپٹی کمشنر رام چندر نے عہدیداروں کو ہدایت دی کہ ضلع میں ڈینگو، ملیریا اور چکن گنیا جیسے امراض کے تعلق سے نہ صرف شہری سطح پر بلکہ دیہی علاقوں میں بھی بیداری مہم چلاتے ہوئے ان امراض سے متاثرہ افراد کی نشاندہی کی جائے اورایک تفصیلی رپورٹ تیار کرکے بیدر ضلع انتظامیہ کو پیش کی جائے۔

ڈپٹی کمشنر نے عہدیداروں کو مشورہ دیا کہ دیہی علاقوں میں سروے کے لیے آشا ورکرز سے تعاون حاصل کیا جائے۔ انہوں نے کہا کہ آشا ورکرز دیہی علاقوں کے تمام گھروں پر جاکر اس بات کا پتہ چلائیں کہ کتنے لوگ ڈینگو، ملیریا اور چکن گنیا جیسے امراض سے متاثر ہوئے ہیں اور اس وقت دیہات میں ان امراض کی کیا صورتحال ہے؟

ڈپٹی کمشنر نے کہا کہ کالجز کے طلباء کے لئے خصوصی طور پر ویکسین کا انتظام کیا جائے۔ انہوں نے اپنے بیان میں کہا کہ کالجز کے طلباء ویکسین ڈوز لینے کے بعد آن لائن کلاسیز شروع کرنے کی بات ریاستی وزیر تعلیم نارائن نے کہی ہے۔

ڈپٹی کمشنر نے مزید کہا کہ منجیرا ندی کے آس پاس بسنے والے افراد کو ندی کے قریب جانے سے روکا جائے اور عہدیداران اس پر خصوصی نظر رکھیں۔