اسلامی شادیوں کے رواج کو عام کرنے کی ضرورت

ملت اسلامیہ کی خیر خواہی اور بھلائی کے کام اور اس ضمن میں اقدامات وقت کی اہم ضرورت، اسلامی شادیوں کے رواج کو عام کرنا بھی ضروری، ضلع بیدر میں ملتان چیریٹیبل ٹرسٹ کی جانب سے منعقدہ پریس کانفرنس میں علماء و دانشوران نے اظہارِ خیال کیا۔

ریاست کرناٹک کے ضلع بیدر میں ملتان چیر یٹیبل ٹرسٹ کی جانب سے ایک پریس کانفرنس کا انعقاد عمل میں لایا گیا۔ اس موقع پر ٹرسٹ کے صدر حکیم شاہ ضیاء الاسلام جنیدی نے میڈیا سے بات کرتے ہوئے کہا کہ ملت اسلامیہ کی خیر خواہی اور بھلائی کے کاموں کی خاطر ملتان چیریٹیبل ٹرسٹ کا انعقاد عمل میں لایا گیا ہے۔ جس کے تحت عوام کے لیے فلاحی کام کیے جائیں گے۔

ٹرسٹ کے تحت میریج بیورو کا بھی انعقاد عمل میں لایا گیا ہے، جس کا واحد مقصد شادیوں کو آسان بنانا، اسلامی شادیوں کے رواج کو عام کرنا، شادیوں میں بے جا رسومات اور اسراف کے خاتمے کے لیے رشتہ لگانے والی یا لگانے والوں کی لوٹ مار کو ختم کرنا ہے۔ خصوصی طور پر سنت رسول صلی اللہ علیہ وسلم کے مطابق شادیوں کو عام کرنے کی غرض سے اس کو شروع کیا گیا ہے۔

انہوں نے کہا کہ مسجد بیدری کی اوپری منزل میں اس کے لیے دفتر کھولا گیا ہے۔ رشتوں سے متعلق فکرمند والدین اپنی لڑکیوں اور لڑکوں کی مکمل معلومات یہاں پر مفت میں جمع کروا سکتے ہیں، انہوں نے مزید کہا کہ رشتے آپس میں جوڑنے کے لیے ان شاء اللہ ہر ماہ ایک مرتبہ آمنے سامنے پروگرام منعقد کیا جائے گا۔ جس کے لیے صبح دس بجے سے دوپہر ایک بجے تک دفتر کھلا رہے گا جب کہ جمعہ کو یہ دفتر بند رہے گا۔