Karnataka HC on TV Anchor Petition کرناٹک ہائی کورٹ نے ٹی وی اینکر کی عرضی پر سماعت بیس ستمبر تک ملتوی کردی

کرناٹک ہائی کورٹ نے ٹی وی اینکر کی عرضی پر سماعت 20 ستمبر تک ملتوی کر دی ہے۔ عرضی میں ایک نجی چینل کے میزبان شو میں فرقہ وارانہ ہم آہنگی کو خراب کرنے کی سازش کا الزام لگایا گیا ہے۔ Karnataka High Court adjourned TV anchor petition

بنگلورو:بتاریخ 12 ستمبر کو کرناٹک مینارٹیز ڈیولپمنٹ کارپوریشن کے ایک اہلکار نے ایک نجی چینل کے سدھیر چودھری کے خلاف ان کی میزبانی کے شو میں "فرقہ وارانہ ہم آہنگی کو خراب کرنے کی سازش" کرنے پر معاملہ درج کرایا تھا۔ اس معاملہ کی سنوائی کے دوران کرناٹک ہائی کورٹ نے ریاستی حکومت سے کہا کہ وہ بنگلور پولیس کو ہدایت دے کہ وہ ایک نجی چینل کے نیوز اینکر سدھیر چودھری کے خلاف برادریوں کے درمیان نفرت کو فروغ دینے کے ایک معاملہ میں "تیز کارروائی" نہ کرے۔ ہائی کورٹ نے یہ زبانی حکم 20 ستمبر تک ملتوی کرتے ہوئے چودھری کی طرف سے دائر درخواست پر دیا۔ جس میں ان کے خلاف تعزیرات ہند کی دفعہ 153 اے اور 505 کے تحت درج ایف آئی آر کو منسوخ کرنے اور تحقیقات پر عبوری روک دینے کی مانگ کی گئی تھی۔

تاہم عدالت نے بنگلور کے شیشادری پورم پولیس اسٹیشن میں درج ایف آئی آر میں تفتیش پر عبوری روک نہیں دی۔ جسٹس ہیمنت چندنگودار نے کہا کہ اس کیس میں نیوز اینکر کی تحویل میں پوچھ گچھ کی ضرورت نہیں ہے کیونکہ کیس میں مواد پبلک ڈومین میں موجود ہے۔ 20 ستمبر کو عدالت اس بات کا فیصلہ کرے گی کہ آیا 11 ستمبر کو نشر ہونے والے پروگرام کے لیے ٹی وی اینکر کے خلاف نفرت کو ہوا دینے کا اولین طور پر مقدمہ چلایا جا سکتا ہے یا نہیں۔ شکایت کے مطابق، شو میں چودھری نے الزام لگایا تھا کہ کرناٹک حکومت کی ایک اسکیم - جو اقلیتی برادریوں کے اراکین کو تجارتی گاڑیاں خریدنے کے لیے سبسڈی کی پیشکش کرتی ہے۔ صرف مسلمانوں تک محدود تھی اور اکثریتی برادری تک نہیں پھیلائی گئی تھی۔

اس اسکیم کے بارے میں ایک اخبار میں شائع ہونے والے ایک اشتہار نے اس تنازعہ کو جنم دیا تھا کیونکہ بی جے پی کے اراکین پارلیمنٹ نے الزام لگایا تھا کہ اس اسکیم نے کانگریس کے دور حکومت میں "اقلیتی خوشنودی" کو نمایاں کیا ہے، یہاں تک کہ حکومت نے برقرار رکھا کہ یہ اسکیم مختلف ترقیاتی کارپوریشنس کے تحت کئی سالوں سے موجود ہے جو کہ مختلف کمیونٹیز کی فلاح و بہبود کے لیے ہے۔ حکومت نے کہا کہ دیگر گروپوں کے لیے بھی اسی طرح کی اسکیمیں موجود تھیں، انہوں نے مزید کہا کہ اقلیتوں کے لیے سبسڈی اسکیم کرناٹک میں بی جے پی کے دور میں بھی موجود تھی۔

ایف آئی آر میں کہا گیا کہ شو میں چودھری نے مبینہ طور پر دعویٰ کیا کہ سبسڈی کرناٹک میں صرف اقلیتوں کو فراہم کی جا رہی ہے نہ کہ ہندوؤں کو۔ ایف آئی آر کے مطابق، "شو میں دعویٰ کیا گیا کہ اس اسکیم سے ریاست میں غریب ہندوؤں کے ساتھ ناانصافی ہوئی اور ریاست میں فرقہ وارانہ ہم آہنگی کو خراب کرنے کی سازش کی گئی۔" جہاں چودھری اس کیس میں ملزم نمبر ایک ہیں، آج تک کے چیف ایڈیٹر اور آج تک کے آرگنائزر بالترتیب نمبر دو اور نمبر تین ملزم ہیں۔ لہٰذا کرناٹک ہائی کورٹ نے سدھیر چودھری کو نفرت پھیلانے کے معاملہ میں گرفتاری سے عارضی تحفظ دیا ہے۔