بنگلور: مسلم طلبا کو قانون کی پڑھائی کےلیے اسکالرشپ کا اعلان

ریاست کرناٹک کے بنگلور میں قانون (لاء) کی پڑھائی کے لیے مسلم طلبا کو اسکالرشپ دینے کا اعلان کیا گیا۔ اس اسکالرشپ کا اصل مقصد شعبہ وکالت میں مسلمانوں کے تناسب کو بڑھانا ہے۔

بنگلور کے معروف تاجر ڈاکٹر بومنانہ ہلی بابو نے مستحق غریب طلبا کو لاء کی پڑھائی کےلیے اسکالرشپ دینے کا اعلان کیا۔ انہوں نے کہا کہ ’عدلیہ میں اقلیتوں کی نمائندگی نہ کے برابر ہے اور عدلیہ میں مسلمانوں کی نمائندگی کو بڑھانا میرا خواب ہے جبکہ اس کمی کو دور کرنے کےلیے ایک پروجکٹ کے تحت مسلم طلبا کو اسکالرشپ کے ذریعہ مدد دی جائے گی‘۔

مذکورہ پروجیکٹ کی چیئرپرسن پروفیسر نازنین بیگم نے بتایا کہ ’ قابل وکلا نہ صرف مسلمانوں کے حقوق کا تحفظ کرسکتے ہیں بلکہ ملک کی سالمیت کے تحفظ کےلیے بھی نمایا رول ادا کرسکتے ہیں۔

اس موقع پر معروف وکیل محمد طاہر نے مسلم طلبا سے اپیل کی کہ وہ اسکالرشپ سے بھرپور فائدہ اٹھائیں اور کڑی محنت کے ذریعہ قوم و ملت کی خدمت کریں۔