Rahul Gandhi Supports Hijab-wearing Students: 'حجاب کی آڑ میں بیٹیوں کے مستقبل پر ڈاکہ ڈالا جا رہا ہے'

کانگریس رہنما راہل گاندھی نے ٹوئٹ کیا کہ طالبات کی تعلیم میں حجاب کو حائل کر کے ہم بھارت کی بیٹیوں کے مستقبل پر ڈاکہ ڈال رہے ہیں۔ 'ماں سرسوتی سب کو علم سے آراستہ کرے، وہ کسی کے ساتھ امتیاز نہیں کرتیں'۔

کرناٹک کے اڈپی ضلع کے کونڈاپور میں سرکاری پری یونیورسٹی کالج میں حجاب پہنی طالبات کو گذشتہ کچھ دنوں سے داخل ہونے کی اجازت نہیں دی جارہی ہے اور انہیں تعلیم حاصل کرنے سے روکا جارہا ہے۔

مسلم طالبات کو کالج میں داخل ہونے سے روکنے کے معاملہ میں حکومت پر تنقید کرتے ہوئے آج راہل گاندھی نے ٹوئٹ کیا کہ 'حجاب کی آڑ میں بھارت کی بیٹیوں کے مستقبل پر ڈاکا ڈالا جارہا ہے'۔

انہوں نے کہا کہ ماں سرسوتی سب کو تعلیم دیتی ہیں اور وہ کسی کے ساتھ کوئی امتیاز نہیں کرتیں۔

وہیں انتظامیہ کا کہنا ہے کہ حجاب پہننے پر سختی سے پابندی عائد کی گئی ہے۔ ریاستی حکومت کی جانب سے اس سلسلہ میں احکامات جاری کیے گئے ہیں۔

اس مسئلہ پر گذشتہ کچھ روز سے طالبات کے ساتھ ان کے والدین نے بھی کالج گیٹ کے باہر احتجاجی مظاہرہ کیا۔

اسی دوران مسلم طالبات نے ڈپٹی کمشنر سے ملاقات کرتے ہوئے اس معاملہ کو جلد از جلد حل کرنے کا مطالبہ کیا تاکہ حجاب پہننے والی لڑکیوں کےلیے بھی تعلیمی ماحول سازگار ہوسکے۔