بنگلور کے تاجر کا قابل قدر عمل، روزہ داروں کے لیے نعمت

بھارت کے جنوبی شہر بنگلور کا معروف علاقہ ریسیڈینسی روڈ کے تاجر منور شریف نے مسلم تاجروں اور ملازمین کے لیے اپنے دفتر میں دو کمرے نماز اور افطار کرنے کے لیے مختص کیے ہیں۔ منور شریف نے تقریباً 30 برس قبل یہ قدم اٹھایا تھا۔

اس علاقے میں کثیر تعداد میں مسلمانوں کے بھی کاروبار ہیں اور کئی مسلم افراد مختلف کمپنیوں میں برسر ملازمت ہیں، لیکن قریب میں کوئی مسجد نہیں ہے۔

ماہ رمضان المبارک میں افطار اور صلاۃ تراویح کا خاص اہتمام کیا جاتا ہے۔ لیکن چونکہ یہ بہت پاش علاقہ ہے اور یہاں کمپنیوں کے دفاتر ہیں جس میں سینکڑوں ملازمین کام کرتے ہیں، انہیں اس ماہ مقدس میں عبادت کرنے میں پریشانی ہوتی ہے کیوں کہ اردگرد نہ تو کوئی مسجد ہے اور نہ ہی عبادت کے لیے کوئی مختص جگہ۔

منور شریف کا یہ قدم رمضان المبارک میں ملازمین اور تاجروں کے لیے ایک بڑی نعمت سے کم نہیں۔

ہر روز تقریباً 100 سے زائد فراد اس مسجد میں نماز ادا کرتے ہیں اور افطار سے بھی سیر ہوتے ہیں اور یہ سارا انتظام منور شریف اپنے ذاتی اخراجات سے کرتے ہیں۔