کووڈ 19 وبا کے دوران انسانی ہمدردی کا مظاہرہ

کورونا بحران کے دوران اپنوں کی آخری رسومات انجام دینے سے بھی انکار کیا جا رہا ہے۔ ایسے نازک دور میں پاپولر فرنٹ آف انڈیا لاشوں کی آخری رسومات انجام دیتے ہوئے انسانی ہمدردی کا مظاہرہ پیش کر رہی ہے۔

پاپولر فرنٹ آف انڈیا ضلع یادگیر کے صدر محمد مختار نے ای ٹی وی بھارت سے بات کرتے ہوئے بتایا کہ پاپولر فرنٹ آف انڈیا ملکی، ریاستی اور ضلعی سطح پر کورونا سے مرنے والے افراد کی لاشوں کی آخری رسومات ادا کرنے کا بیڑا اٹھایا ہے۔

یادگیر ضلع سطح پر ہم نے ضلعی انتظامیہ محکمہ صحت اور محکمہ پولیس کی نگرانی اور اجازت پر ضلع کے مختلف تعلقہ جات اور دیہاتوں میں کورونا وائرس سے مرنے والے لوگوں کی آخری رسومات انجام دی ہے۔

محمد مختار نے کہا کہ کورونا کے اس دور میں کسی کی بھی موت پر لوگ خوفزدہ ہیں۔ کورونا کے شکوک کا اظہار کرتے ہوئے بچے ماں باپ کی آخری رسومات انجام دینے سے بھی انکار کر رہے ہیں۔ رشتے دار بھی قریب نہیں آرہے ہیں۔

ان حالات میں 'ہم لوگوں نے ایک ٹیم بنائی اور آخری رسومات کی انجام دہی کا کام سنبھالا۔ انہوں نے مزید کہا کہ ضلع انتظامیہ اور محکمہ صحت نے ہر ممکن ہمارا تعاون کیا ہے جن کی ہمت افزائی پر ہم اس کام کو انجام دے پا رہے ہیں۔ اس سلسلے میں ضلع انتظامیہ کا ہم تہہ دل سے شکریہ ادا کرتے ہیں کہ ان کے تعاون سے ہمیں ایک نیک کام کرنے کا موقع ملا ۔'

اس موقع پر محمد ضمیر احمد شیخ سیکرٹری، محمد یونس رکن کے علاوہ پاپولر فرنٹ آف انڈیا ضلع یادگیر کے دیگر ذمہ داران موجود تھے۔