یادگیر: عیدگاہ میں عیدالاضحیٰ کی نماز ادا نہیں کی جائے گی

ریاست کرناٹک کے یادگیر میں کورونا وبا کے سبب نماز عیدالاضحیٰ عیدگاہ میں ادا نہیں کی جائے گی۔

منصور احمد افغان، صدر قدیم عید گاہ کمیٹی یادگیر نے ای ٹی وی بھارت سے بات کرتے ہوئے بتایا کہ حکومت کی جانب سے اعلان کردہ حکم نامے کے مطابق یکم اگست کو عیدالاضحیٰ منائی جائے گی جبکہ عیدگاہ میں عید کی نماز ادا کرنے پر حکومت نے پابندی عائد کردی ہے۔

انہوں نے کہا کہ یادگیر میں عیدالاضحی کی نماز عیدگاہ میں ادا نہیں کی جائے گی۔ انہوں نے مسلمانوں سے اپیل کی کہ وہ اپنے اپنے محلوں کی مساجد میں عید کی نماز ادا کریں۔

منصور احمد افغان نے کہا کہ عید کے موقع پر کرونا وائرس سے بچنے کے لیے احتیاطی اقدامات پر عمل کریں اور سماجی فاصلہ برقرار رکھیں۔ انہوں نے مزید کہا کہ صفائی کا خاص خیال رکھیں اور جانوروں کے فضلہ کو بلدیہ کی جانب سے مقرر کردہ گاڑیوں ڈالیں۔

انہوں نے عوام سے اپیل عید سادگی سے منانے کی بھی اپیل کی۔