رام مندر کا افتتاح: کرناٹک میں کانگریس حکومت کی مندروں میں خصوصی پوجا کرنے کی ہدایت

Karnataka Special Pooja: کرناٹک حکومت نے ایودھیا میں رام مندر کے افتتاح کے دن ریاست کے مندروں میں خصوصی پوجا کرنے کی ہدایت دی ہے۔ اس دن کرناٹک کے مندروں میں ایک ساتھ خصوصی پوجا کی جائے گی۔

بنگلورو: 22 جنوری کو ایودھیا میں رام مندر کا افتتاح کیا جائے گا۔ اس کے لیے بھرپور تیاریاں کی جا رہی ہیں۔ اس کے پیش نظر کرناٹک کی کانگریس حکومت نے بھی بی جے پی کے نقش قدم پر چلتے ہوئے اس دن مندروں میں خصوصی پوجا کرنے کا حکم دیا ہے۔ کرناٹک کی سدارامیا حکومت نے اس دن ریاست بھر کے مندروں میں ایک ساتھ پوجا کرنے کی ہدایت دی ہے۔ کرناٹک کے ٹرانسپورٹ اور مزرائی کے وزیر راملنگا ریڈی نے 22 جنوری کو ریاست کے تمام مندروں میں ایک ساتھ خصوصی پوجا کا اہتمام کرنے کی ہدایت دی ہے۔ کرناٹک میں ہندو مذہبی ادارے اور خیراتی اوقاف کا محکمہ مزرائی کے نام سے جانا جاتا ہے۔

اس دن ریاست کے مندروں میں دوپہر 12:29:8 سے 12:30:32 تک ایک ساتھ خصوصی پوجا کی جائے گی۔ مہامنگل آرتی کرنے اور خصوصی دعا کرنے کی تجویز دی ہے۔ آپ کو بتا دیں کہ حال ہی میں ایودھیا رام مندر کی افتتاحی تقریب میں ریاست کے وزیر اعلیٰ سدارامیا کو مدعو نہ کرنے کا معاملہ گرم ہو گیا تھا۔ سابق ریاستی وزیر اور کانگریس لیڈر ہولال کیرے انجنے نے اس مسئلہ پر سدارامیا کا موازنہ رام سے موازنہ کر دیا۔ ہولال کیرے نے کہا کہ 'بی جے پی کے رام' کی پوجا کرنے کے لیے ایودھیا جانے کی ضرورت نہیں ہے۔ انہوں نے کہا کہ سدارامیا خود رام ہیں تو پھر ایودھیا جا کر وہاں پوجا کیوں کریں؟ وہ بی جے پی کے رام ہیں۔

واضح رہے کہ ایودھیا میں بابری مسجد کے انہدام کے بعد متنازع زمین کے لیے چلی طویل عدالتی جنگ میں سپریم کورٹ کے فیصلے کے بعد حکومت کی نگرانی میں رام مندر تعمیر کیا گیا ہے۔ 22 جنوری کو اس مندر کا افتتاح سب سے بڑے آئیینی عہدے پر بیٹھے ملک کے وزیر اعظم نریندر مودی کریں گے۔ اس موضوع پر اپوزیشن اتحاد کی حلیف جماعتوں کے بیچ اختلاف کھل کر سامنے آگیا ہے۔ جہاں ٹی ایم سی اور سی پی آئی ایم نے رام مندر کی افتتاحی تقریب میں شرکت کرنے سے انکار کر دیا ہے وہیں کانگریس سمیت کئی اپوزیشن پارٹیوں نے اس تقریب میں شرکت کا فیصلہ کیا ہے۔ ان پارٹیوں کو خدشہ ہے کہ رام مندر کی افتتاحی تقریب کی مخالفت کی وجہ سے دائیں بازو کی پارٹیاں کہیں ان پر ''ہندو مخالف'' ہونے کا الزام نہ لگا دیں۔ حالانکہ کرناٹک حکومت کے حکم سے واضح رہے کہ کانگریس نے نہ صرف اس تقریب میں شرکت کرنے کا فیصلہ کیا ہے بلکہ بی جے پی کے نقش قدم پر چلتے ہوئے اس موضوع کو بھنا کر خود کو رام بھکت ثابت کرنے کا فیصلہ کیا ہے۔