بنگلور: جامع مسجد ٹرسٹ بورڈ کا اجتماعی شادی تقریب کا اعلان

عالمی وبا کورونا وائرس نے غریبوں اور مزدوروں کی کمر توڑ کر رکھ دی ہے جس کا احساس کرتے ہوئے بنگلور میں 'جامع مسجد ٹرسٹ بورڈ' نے 151 جوڑوں کی شادی کرانے کا اعلان کیا ہے۔

کرناٹک کے دارالحکومت بنگلور شہر گلستان کی متعدد مساجد سماجی و فلاحی کار خیر کے لیے مشہور ہیں جو کہیں مساجد میں انفارمیشن سینٹر کا قیام کرتی ہیں تو کہیں ڈائلیسس کے مریضوں کو طبی و مالی امداد فراہم کرتی ہیں۔

اسی طرح 'جامع مسجد ٹرسٹ بورڈ کمیٹی' جس نے کورونا وبا کے دوران غریب و مستحق خاندانوں میں راشن و دیگر امداد تقسیم کیں، اب اس وبا اور لاک ڈاؤن سے متاثر غریب خاندانوں کی لڑکیوں کی اجتماعی شادیاں کروانے کے لیے آگے آئی ہے۔

جمع مسجد ٹرسٹ بورڈ' نے 151 جوڑوں کی شادی کرانے کا اعلان کیا ہے

جامع مسجد ٹرسٹ بورڈ کی کمیٹی کا شہر کے متعدد مساجد کے ائمہ کرام و متولیان کے ساتھ ایک اجلاس منعقد ہوا اور اس موضوع کے متعلق نامہ نگاروں سے بات کرتے ہوئے بورڈ کے سیکرٹری عثمان شریف نے بتایا کہ بورڈ کی جانب سے اجتماعی شادیوں کی پہل 151 غریب جوڑوں کے نکاح سے ہوگی۔

لاک ڈاؤن سے متاثر غریب خاندانوں کی لڑکیوں کے اجتماعی شادیاں کروانے کے لیے آگے آئی ہے

اس موقع پر ایس ایس قادری نے بتایا کہ وہ اس کار خیر کے لیے فنڈز جامع مسجد ٹرسٹ بورڈ سے نہیں بلکہ کانٹریبیوشنز اور زکات و صدقات سے پُر کرے گی، جو زکات کا بہترین مصرف ہوگا۔

جمع مسجد ٹرسٹ بورڈ نے اجتماعی شادی کا اعلان کیا

انہوں نے مزید بتایا کہ ایک شادی کے لیے تقریباً 75 ہزار روپے خرچ کیے جائیں گے۔

اس موقع پر عثمان شریف نے عوام سے اپیل کی ہے کہ وہ اجتماعی شادیوں کے لیے ایپلیکیشن فارم بورڈ کے دفتر یا دیگر مساجد سے حاصل کرسکتے ہیں۔