یادگیر: سیلاب کے پیش نظر سینئر افسران کو ہدایات

یادگیر کے ڈپٹی کمشنر ڈاکٹر راگاپریا نے سیلاب کے پیش نظر ضلع اور تعلقہ سطح کے عہدیداروں کو متعدد اقدامات کرنے کی ہدایات جاری کی ہے۔

کرناٹک میں ضلع یادگیر کے ڈپٹی کمشنر ڈاکٹر راگاپریا نے ضلع اور تعلقہ سطح کے عہدیداروں کو ہدایت دی ہے کہ سیلاب کے پیش نظر سبھی افسران اپنے اپنے مقام پر موجود رہیں۔


انہوں نے کہا کہ بارش کا سلسلہ شروع ہوچکا ہے، آبی ذخائر میں پانی کا مسلسل اضافہ ہوتا جارہا ہے، کسی بھی وقت آبی سطح خطرے کے نشان کو عبور کرسکتا ہے۔ ایسی صورتحال میں بارش سے پیدا ہونے والے مسائل سے نمٹنے کے لیے تیاری میں خصوصی توجہ دیں۔

ڈپٹی کمشنر نے مزید کہا کہ اعلیٰ افسران ندیوں کے کنارے واقع گاؤں پر سخت نظر رکھیں اور لوگوں کو ندیوں کے قریب جانے سے روکیں۔ ضرورت پڑنے پر ان لوگوں کو محفوظ مقامات پر منتقل کریں۔

انہوں نے کہا کہ 'تعلقہ سطح پر ٹاسک فورس کمیٹی تشکیل دی جائے جو بارش سے پیدا ہونے والے مسائل سے نمٹنے میں اپنی خدمات انجام دے سکے، تعلقہ سطح کے انتظامیہ گرام پنچایت سطح پر انتظامیہ سے روزانہ بارش کے تعلق سے تفصیلی رپورٹ حاصل کریں۔