بنگلورو: کرناٹک اسمبلی انتخابات کے تحت انتخابی مہم زوروں پر ہے۔ دریں اثنا، حکام نے ہفتے کے روز کہا کہ پولیس اور محکمہ انکم ٹیکس کے اہلکاروں نے کروڑوں کی غیر قانونی رقم ضبط کی ہے۔
محکمہ انکم ٹیکس نے 20 کروڑ روپے کے اثاثے ضبط کیے ہیں، جن کے بارے میں کہا جاتا ہے کہ یہ اسمبلی انتخابات میں حصہ لینے والے کچھ امیدواروں نے غیر قانونی اخراجات کے لیے جمع کرائے تھے۔
معلومات کے مطابق، 4 مئی کو کئے گئے تلاشی آپریشن کے دوران بنگلورو اور میسور میں مختلف فائنانسرز سے کل 15 کروڑ روپے سے زیادہ نقد اور تقریباً 5 کروڑ روپے کے ہیرے کے زیورات ضبط کیے گئے تھے۔ محکمہ انکم ٹیکس نے ایک ریلیز میں کہا کہ بنگلورو کے مختلف مقامات بشمول شانتی نگر، کاکس ٹاؤن، شیواجی نگر، آر ایم وی کالونی، کننگھم روڈ، سداشیو نگر، کمارپارک ویسٹ، فیئر فیلڈ لے آؤٹ پر تلاشی لی گئی۔
محکمہ انکم ٹیکس کے افسران نے ہفتہ کو کہا، 'جیسے جیسے کرناٹک اسمبلی انتخابات قریب آرہے ہیں، انکم ٹیکس کے چھاپے تیز کیے جارہے ہیں۔ اب تک ریاست میں چھاپوں کے دوران کئی کروڑ روپے کے غیر قانونی اثاثوں کو ضبط کیا گیا ہے۔
اہم بات یہ ہے کہ انتخابی ریاست کرناٹک میں مختلف محکموں کے افسران نے اب تک چھاپے مار کر 330 کروڑ سے زیادہ کی نقدی اور دیگر اشیاء ضبط کی ہیں۔ ذرائع نے بتایا کہ یہ ووٹروں میں بطور تحفہ تقسیم کرنا تھا۔ کرناٹک کے دیگر اضلاع کے مقابلے بنگلور میں سب سے زیادہ دورے ہوئے ہیں۔ صرف بنگلورو میں ہی 82 کروڑ روپے سے زیادہ کی نقدی اور اشیاء ضبط کی گئی ہیں۔