حلال سرمایہ کاری کے نام پر کروڑوں کی دھوکہ دہی

شہر بنگلورو میں تقریبا گزشتہ دو برسوں میں کئی کمپنیوں نے لوگوں سے خاص کر مسلم طبقہ کے لوگوں سے حلال سرمایہ کاری کے نام پر کروڑوں روپے اینٹھے اور فرار ہوگئے۔

اس سلسلے میں متاثرین نے بے شمار احتجاج کیے اور ریاستی حکومت سے خاطیوں کے خلاف کارروائی کرنے کا مطالبہ بھی کیا لیکن متاثرین کا الزام ہے کہ اس معاملے میں حکومت کی جانب سے کسی قسم کی کوئی کارروائی نہیں کی گئی ہے۔

متاثرین کا یہ بھی الزام ہے کہ کہ ان پونزی اسکیموں میں کئی برسر اقتدار سیاست داں اور سی بی آئی پولیس اہلکاروں کے بھی ہاتھ ہے۔

اس ضمن میں شہر بنگلور کے گاندھی جی کے مجسمہ کے پاس متاثرین کی ایک بڑی تعداد نے "لنچہ مکتہ کرناٹکا" نامی تنظیم کے ذمہ داران کی رہنمائی میں ایک زبردست احتجاج کیا اور حکومت سے معاملے میں کارروائی کرنے کا مطالبہ کیا۔

اس احتجاج میں متاثرہ خواتین نے بھی شرکت کی اور اپنے غم و غصہ کا اظہار کیا۔

لنچہ مکتہ کرناٹکا تنظیم کے ذمہ داران کا کہنا ہے کہ حکومت کی ان پونزی اسکوموں کے متعلق لوگوں کو آگاہ کیا تھا کہ یہ لوگوں کو حلال سرمایہ کاری کے نام پر ان کی کمائی پر ہاتھ صاف کردیتے ہیں۔

لیکن ریاستی حکومت نے کبھی کوئی کارروائی نہیں کی اور ہزاروں کروڑوں کا غبن کرنے کے بعد بھی لٹیرے ضمانت حاصل کر آزاد گھوم رہے ہیں۔