Darga of Hazrat Ladle Mashaikh Ansari: الند شریف کی درگاہ حضرت لاڈلے مشائخ انصاری قومی یکجہتی کا مرکز

کرناٹک میں گلبرگہ ضلع کا الند علاقہ قومی یکجہتی کا گہوارہ ہے۔گلبرگہ کو صوفی سنتوں کا شہر بھی کہا جاتا ہے۔ یہاں پر صوفیہ کرام کی متعدد بارگاہیں موجود ہیں۔

گذشتہ ایک ہفتہ قبل پیش آئے کشیدگی کے واقعات اور بے قصور مسلم نوجوانوں کی گرفتاری پر شرماجیوی گلا تنظیم کے ریاستی صدر چندر شیکھر ہرمٹھ نے افسوس کا اظار کیا۔

انہوں نے ای ٹی وی بھارت کو بتایا کہ الند شہر حضرت لاڈلے مشائخ انصاری کے درگاہ سے مشہور ہے۔ الند، ایک چھوٹا سا علاقہ ہے، یہاں زیادہ تر غریب مزدور عوام رہتے ہیں اور یہاں روزگار کے مواقع بھی بہت کم ہے۔ اکثر لوگ یہاں مزدوری کرتے ہیں۔

چندر شیکھر ہرمٹھ نے بتایا کہ ایسے حالات میں سیاسی رہنما اس علاقے کو ترقی دینے کے بجائے اپنی سیاسی روٹیاں سیکھنے کے لیے ذات پات کی سیاست کے ذریعہ ہندو اور مسلمانوں کو باٹنے کی کوشش میں مصروف ہیں۔

انہوں نے کہا کہ کئی برسوں سے بلالحاظ مذہب و ملت لوگ حضرت لاڈلے مشائخ انصاری کی درگاہ پر حاضری دیتے ہیں۔ یہاں پر قومی یکجہتی و گنگا جمنی تہذیب کی مثال دیکھنے کو ملتی ہے جبکہ یہاں دونوں فرقوں کے درمیان نفرت پیدا کرنے کی کوشش کی جارہی ہے۔ انہوں نے لوگوں سے سیاسی رہنماؤں کے بہکاوے میں نہ آنے اور پرامن ماحول کو برقرار رکھنے کی اپیل کی۔