کرناٹک میں زیکا وائرس پر قابو پانے کے لئےرہنما ہدایات جاری

حکومت کرناٹک نے ہمسایہ ریاست کیرالہ میں زیکا وائرس کا انفیکشن پائے جانے کے بعد اس کے پھیلاؤ پر قابو پانے کے لئے نئی ہدایات جاری کی ہے۔

ریاستی صحت کے کمشنر تریلوک چندرا کی جانب سے رہنما خطوط میں کہا گیا ہے کہ مانسون کے موسم میں ایڈیز مچھر کثیر تعداد میں پیدا ہوتے ہیں اور یہی زیکا وائرس کاسبب بنتے ہیں، لہذا تمام دیہی اور شہری علاقوں میں ان پر قابو پانا ضروری ہے۔

انہوں نے متعلقہ عہدیداروں کو ایڈیز مچھروں کی افزائش کو روکنے کے لئے گھروں کے آس پاس پڑے کچڑوں کو ہٹانے کی ہدایات دی ہیں۔رہنما خطوط کے مطابق افسران کو ہوائی اڈوں، سمندری بندرگاہوں، دیہی اور شہری وارڈوں میں ایڈیز لاروا کی نگرانی کا کام سونپا گیا ہے۔ مشتبہ معاملات سے جڑے نمونے اکٹھا کرنے اور انہیں جانچ کے لئے بنگلور واقع نیشنل انسٹی ٹیوٹ آف وائرولوجی (این آئی وی) کو بھیجنے کی صلاح دی گئی ہے۔

مسٹر چندرا نے کہا کہ بخار، چکتے، جوڑوں میں درد اور آنکھوں میں جلن زیکا وائرس کی علامات ہیں۔ انہوں نے کہا کہ کیرالہ میں زیکاوائرس انفیکشن کے معاملے سامنے آنے کے بعد سرحدی اضلاع چامراج نگر، جنوبی کنڑ اور اڈپی میں زیادہ احتیاط برتنے کی ضرورت ہے۔اس درمیان انتظامیہ نے دوسری ریاستوں سے کرناٹک آنے والے لوگوں کو اپنے ساتھ منفی رپورٹ رکھنا لازمی قراردے دیا ہے۔

یو این آئی