دوست و احباب میں کتابوں کا تحفہ دیں: عزیز اللہ سرمست

کرناٹک کے ضلع یادگیر کے تعلقہ شاہ پور میں اردو روزنامہ کے بی این ٹائمز کے مدیر عزیز اللہ سرمست نے صحافیوں سے خطاب کرتے ہوئے کہا کہ آج وقت کا تقاضہ ہے کہ ہر آدمی اردو مادری زبان کی حیثیت سے سرگرم رول ادا کریں۔ اردو زبان کو فروغ دینے کے لیے اردو اخبارات اور اردو رسائل کو خرید کر پڑھنا نہایت ضروری ہے۔

عزیز اللہ سرمست نے کہا کہ موجودہ حالات اور وقت کی مناسبت سے آپ اپنے بچوں کو علاقائی زبان یا پھر انگریزی زبان میں تعلیم دلوا رہے ہو مگر اپنے اپنے گھروں میں اپنے بچوں کو اردو تعلیم سیکھنے کا انتظام کریں۔

انہوں نے کہا کہ میں نے ایک تحریک شروع کی ہے وہ یہ کہ شال پوشی اور گلپوشی کے عمل کو ترک کریں۔ اس تحریک پر عمل کرتے ہوئے کئی لوگ بہتر تاثرات کا اظہار فرمایا ہے اور اس کے بہتر نتائج برآمد ہورہے ہیں۔

عزیز اللہ سرمست نے کہا کہ چاہے کوئی بھی تقاریب ہو اس میں شال پوشی اور گل پوشی کے عمل کو ترک کرتے ہوئے آپ تحفے میں اردو کی کتابیں دیں۔

انہوں نے اہل اردو سے اپیل کرتے ہوئے کہا کہ اپنے دوست احباب میں ملاقات کے وقت اردو کی کتابیں دیں۔ اس سے لوگوں میں مطالعہ کے ذوق میں اضافہ ہوگا، جو آج بالکل دیکھنے کو نہیں مل رہا ہے۔

موجودہ حالات میں لوگ اخبار اور رسالے یا پھر دیگر معلوماتی کتابوں سے کوسوں دور ہوگئے ہیں۔ اس تحریک اور اس عمل سے ایک طرف لوگوں میں مطالعے کا ذوق پروان چڑھے گا تو دوسری جانب ادیبوں اور شاعروں کی کتابوں کی فروخت میں بھی اضافہ ہوگا اور ان کی ہمت افزائی ہوگی۔