گلبرگہ: صفا بیت المال کی جانب سے مریضوں میں کھانے کی تقسیم

مذہبِ اسلام میں ضرورت مندوں اور غریبوں کو کھانا فراہم کرنا، پیاسوں کو پانی پلانا، غریبوں اور مریضوں کی مدد کرنا بہت بڑا ثواب مانا جاتا ہے۔ اسی مقصد سے ریاست کرناٹک کے گلبرگہ شہر میں جیمس ہسپتال کے سامنے گزشتہ دو مہینوں سے صفا بیت المال کی جانب سے مریضوں اور ان کے ساتھ رہنے والے رشتے داروں کو کھانا تقسیم کیا جارہا ہے۔

اس موقع پر صفا بیت المال ضلع گلبرگہ کے صدر مولانا نذیر احمد رشادی نے ای ٹی وی بھارت کو بتاتے ہوئے کہا کہ کورونا وائرس کی دوسری لہر کے دوران شہر کے ہسپتالوں میں موجود مریضوں کی پریشانیوں کو محسوس کرتے ہوئے 27 اپریل کو صفا لنگر کے نام سے روزانہ دوپہر میں مریضوں اور ان کے رشتے داروں کے لئے کھانا پانی تقسیم کرنے کا کام شروع کیا گیا تھا۔

انہوں نے کہا کہ آج اس کام کو شروع کیے ہوئے دو ماہ مکمل ہو گئے ہیں۔ جس سے کافی مریضوں اور غریبوں کو مدد مل رہی ہے۔ اس کام کو 365 دن تک جیمس اسپتال میں جاری رکھا جائےگا اور اسی کے ساتھ ساتھ کینسر کے مریضوں کے لئے جوس بھی تقسیم کیا جارہا ہے۔

گلبرگہ: صفا بیت المال کی جانب سے مریضوں میں کھانا تقسیم کیا جا رہا

انہوں نے کہا کہ صفا بیت المال نے کورونا وائرس کی دوسری لہر کے دوران مفت ایمبولنس کی سروس بھی شروع کی ہے۔ جس کے ذریعہ مریضوں کو ہسپتال پہنچانے کی خدمات انجام دی جارہی ہے۔ واضح رہے کہ صفا بیت المال کی خدمات کی شہر بھر میں لوگ تعریف کررہے ہیں۔