سیلاب متاثرین کو مفت طبی امداد

گزشتہ ماہ کرناٹک کے ریاست بھر میں سیلاب ایک مصیبت بنکر کئی شہروں و دیہاتوں کو اپنی زد میں لیا تھا اور خاص طور پر شمالی کرناٹک کا جیسے بیلگام، ہبلی وغیرہ علاقے پوری طرح سے اس سیلاب کی زد میں آگئے تھے۔

حالانکہ شمالی کرناٹک کے بیلگام ضلع کے کئی علاقوں میں اب سیلاب کے بہاؤ میں کافی کمی آئی ہے، لیکن متاثرین کی ایک بڑی تعداد مختلف امراض کا شکار ہوئے ہیں۔
اس سلسلے میں شہر بنگلور کے ڈاکٹر انڈیا چیریٹیبل ٹرسٹ نے ریاست بھر کے مختلف علاقوں میں دورہ کر سیلاب زدگان کا چیک اپ کر انہیں مفت میں دوائیاں بھی فراہم کیں۔ یہ سلسلہ پچھلے پورے مہینہ چلتا رہا۔ اب جب کہ سیلاب خاصا تھم چکا ہے، لیکن سیلاب کے متاثرین اس سے آئی بیماریوں میں مبتلا ہیں۔
اسی معاملہ میں ڈاکٹر انڈیا چیریٹیبل ٹرسٹ کی چھ ڈاکٹروں پر مشتمل ٹیم آج شہر بیلگام و اطراف کے علاقے میں دورے پر نکل رہی ہے۔ انہوں نے دوائیوں کی خاصی تعداد پہلے ہی روانہ کر دیا ہے اور اپنے ساتھ بھی دوائیاں لے جا رہے ہیں جو 3000 سے زائد مریضوں کے لئے کافی ہے۔
اس موقع پر ڈاکٹر انڈیا ٹرسٹ کے ذمہ دار ڈاکٹر حسین نے نامہ نگاروں کو بتایا کہ وہ شہر بیلگام کے مختلف علاقوں میں میڈیکل کیمپ آرگنائز کریں گے، جہاں مریضوں کا مفت علاج کیا جائیگا۔ انہوں نے بتایا کہ دوائیاں و ہیلتھ کیمپ کے دیگر لوازمات وہ عطیات سے جمع کرتے ہیں۔
جے۔ ڈی۔ ایس کے سینیئر نائب صدر سید شفیع اللہ نے اس موقع پر ڈاکٹر انڈیا چیریٹیبل ٹرست کی ان بے لوث خدمات کو خوب سراہا اور ان کی حوصلہ افزائی کی۔ انہوں نے بتایا کہ سیلاب متاثرہ علاقوں میں کئی تنظیموں نے روزمرہ کی ضروریات پہنچائی ہیں، لیکن دوائیوں کا فقدان رہا تھا۔ انہوں نے کہا کہ سیلاب زدگان تک پہونچکر یہ ٹرسٹ جو خدمات انجام دے رہا ہے یہ یقیناً قابل ستائش ہے۔