Karnataka Assembly Election کرناٹک انتخابات میں مُعمر شہریوں کیلئے گھروں سے ووٹنگ کا انتظام

ریاست کرناٹک میں چند دنوں کے بعد اسمبلی انتخابات کے تحت ووٹ ڈالے جائیں گے۔ اس سے قبل الیکشن کمیشن آف انڈیا ریاست کے معمر افراد اور معذوروں کے گھروں سے ہی ووٹ ڈالنے کا نظم کیا ۔جس کے خاطر خواہ نتائج برآمد ہوئے۔

یادگیر : الیکشن کمیشن آف انڈیا کی ہدایت کے مطابق ریاست میں کرناٹک عام اسمبلی کے انتخابات میں پہلی بار گھر سے معمر شہریوں کو ووٹنگ کی اجازت دی گئی ہے۔ ضلع الیکشن افسر و ڈپٹی کمشنر سنہل آر نے کہا کہ ریاست میں پہلی بار 80 سال سے زیادہ عمر کے ووٹروں اور معذور ووٹروں کو عام انتخابات کے حصہ کے طور پر گھر سے ووٹ ڈالنے کی اجازت دی گئی ہے۔ 80 سال سے زائد عمر کے اور معذور ووٹرز نے گھر بیٹھے اپنے حق رائے دہی کا استعمال کیا۔

یادگیر ضلع میں، 80 سال یا اس سے زیادہ عمر کے 586 ووٹرز کے ساتھ 90 معذور ووٹرز، کل 676 ووٹرز نے گھر سے ووٹ ڈالنے پر اتفاق کیا تھا جس کے چلتے 03 مئی اور 04 مئی کو ووٹنگ میں 564 سینئر سٹیزن ووٹرز، 89 معذور ووٹرز اور کل 653 ووٹرز نے ووٹ ڈالا۔ ڈپٹی کمشنر نے کہا کہ ووٹ دینے والے بزرگ ووٹرز اور معذور افراد الیکشن کمیشن آف انڈیا کے اس قدم سے بہت خوش ہوئے اور انہوں نے جوش و خروش سے ووٹ ڈالے اور دیگر ووٹروں کو ووٹ ڈالنے کی ترغیب دی۔

ڈپٹی کمشنر نے مزید کہا کہ الیکشن کمیشن آف انڈیا کی بزرگ شہریوں اور معذور افراد کے لئے ووٹ دینے کے لیے بنائی گئی سہولیات کے بہتر نتائج آئیں گے۔ 80 سالوں سے زائد عمر اور معذور افراد کی ووٹنگ میں حصہ لینے سے یقینا ووٹ ڈالنے کی فیصد میں اضافہ ہوگا۔ ووٹنگ سے متعلق لوگوں میں جانکاری فراہم کرنے کی مختلف قسم کی مہم کے ذریعے لوگوں میں ووٹ ڈالنے کے لیے پہل کرنے کی مہم چلائی جارہی ہے۔ واضح رہے کہ اس سال اسمبلی انتخابات 2023 میں الیکشن کمیشن آف انڈیا نے 80 سال سے زائد عمر کے لوگ اور معذور افراد مرد و خواتین کے لیے اپنے گھر سے ووٹ ڈالنے کی سہولت فراہم کی ھے۔