بیدر:کرناٹک کے ضلع بیدر کے معروف ڈاکٹر و ماہر اطفال ڈاکٹر سہیل نے ای ٹی وی بھارت سے موسم گرما میں بچوں میں ہونے والے امراض اور موسم کی تبدیلی کا بچوں کی صحت پر اثر سے متعلق خصوصی بات کی۔ Precaution for children in Summer
انھوں نے بتایا کہ موسم گرما میں خاص طور پر بچوں میں دھوپ کی شدت کا زیادہ اثر ہوتا ہے۔ دھوپ کی شدت کی وجہ سے بچوں کے جسم میں پانی کی مقدار کم ہو جاتی ہے جس کی وجہ سے بچوں میں چڑچڑاپن و دیگر شکایت پائی جاتی ہیں۔ موسم گرما میں زیادہ تر بچے تیرنا یا پھر بار بار نہانا پسند کرتے ہیں جس کی وجہ سے بچوں کے جسم پر دانے نکل آتے ہیں اور کئی بار خارش بھی ہو جاتی ہے جس کی وجہ سے بچے کافی پریشان کرتے ہیں۔
انہوں نے کہا کہ بچوں کو تیز دھوپ میں باہر نکلنے سے منع کیا جائے اور ٹھنڈی چیزوں کا استعمال کریں اور ساتھ ہی صفائی کا خاص خیال رکھیں۔ ڈاکٹر سہیل نے مزید کہا کہ موسم کی تبدیلی کا اثر بھی بچوں کی صحت پر پڑتا ہے۔ اس لئے بچوں کی صحت کو لے کر کافی احتیاط برتنا نہایت ضروری ہے۔
