بنگلور: منہدم کیے گئے اردو ہال کو دوبارہ تعمیر کرائے جانے کا مطالبہ

شہرِ گلستان کے قدیم اوقافی ادارہ "حضرت حمید شاہ حضرت محِب شاہ" میں برسوں قبل بڑی ہی خواہشوں و کاوشوں سے بنائے گئے "اردو ہال" کو ادارے کی کمیٹی نے منہدم کردیا ہے تاکہ اس جگہ ایک بلڈ بینک قائم کیا جائے۔

اس سلسلے میں نہایت غم و غصے کا اظہار کرتے ہوئے کرناٹک اردو اکیڈمی کے سابق چیئرمین مبین منور نے کہا کہ "حضرت حمید شاہ کامپلیکس ادارے کا اردو ہال کو منہدم کرنا اردو کے ساتھ سراسر ناانصافی ہے، لہٰذا انہوں نے مطالبہ کیا کہ اردو ہال کو فوری طور پر دوبارہ تعمیر کیا جائے۔

اس مسئلے کے متعلق حضرت حمید شاہ کامپلیکس ادارے کے چیئرمین جی اے باوا نے بتایا کہ انہوں نے اردو ہال کو ختم نہیں کیا بلکہ اردو ہال کے لئے ایک اور جگہ مختص کی ہے۔

حضرت حمید شاہ حضرت محیب شاہ درگاہ کامپلیکس

اس موقع پر مبین منور نے کرناٹک وقف بورڈ سے اپیل کی کہ وہ حضرت حمید شاہ کمپلیکس ادارے کی کمیٹی کو فوری طور پر تحلیل کرے، بصورت دیگر اردو دانوں کی جانب سے ریاست بھر میں احتجاج منعقد کیے جائیں گے۔

یاد رہے کہ اردو ہال میں دینی درس و ادب سے متعلق ریاست بھر کے کئی اداروں کے پروگرام منعقد کئے جاتے تھے، یہ ساری ریاست میں ایک واحد اردو ہال تھا۔