سوشل ڈیموکریٹک پارٹی آف انڈیا ضلع یادگیر کے صدر سید اسحاق خالد نے میڈیا سے بات کرتے ہوئے کہا کہ جمعرات کو یادگیر ضلع کے تعلقہ شاہ پور میں بسوا سرکل پر صبح 10 بجے ایس ڈی پی آئی کی جانب سے گئوکشی بل کے خلاف احتجاج کیا جائے گا۔ انھوں نے کہا کہ مذکورہ بل کے ذریعہ مسلمان دلت اور کسانوں کو نشانہ بنایا جارہا ہے۔
اس احتجاج میں ایس ڈی پی آئی کے علاوہ دلت سنگھرش سمیتی بھی حصہ لے گی۔
سید اسحاق خالد نے کہا کہ ریاست کی بی جے پی حکومت گئوکشی بل کو منظور کر کے اسے گورنر کرناٹک کی منظوری کے لیے بھیجا ہے جو ایک غیر جمہوری اور غیر قانونی بل ہے جس سے ریاست کے کسان اور گوشت کے کاروباری متاثر ہوں گے۔
انھوں نے مزید کہا کہ کسان، بوڑھے جانوروں کو فروخت کر کے اپنی ضرورتوں کو پورا کرتے ہیں مگر اس بل کے لاگو ہونے کے بعد بیچنے والوں اور خریدنے والوں کو پریشانی ہوسکتی ہے۔
انہوں نے کہا کہ ریاست پہلے ہی بے روزگاری سے جوجھ رہی ہے۔ اوپر سے ریاستی حکومت غیر ضروری بل لاکر عام لوگوں کو اور خاص کر کسانوں کو پریشان کر رہی ہے۔
اس موقع پر دلت سنگھرش سمیتی کے دیگر ذمہ داران بھی موجود تھے۔
یہ بھی پڑھیں:کرناٹک: 10 ویں اور 12 ویں درجہ کی کلاس یکم جنوری سے شروع ہو گی