گلبرگہ: اسپتال کے بیت الخلا میں کورونا مریض کی موت

ریاست کرناٹک کے شہر گلبرگہ میں واقع جیمس اسپتال کے بیت الخلا میں پیر پھسل جانے کے سبب کورونا وائرس سے متاثرہ ایک شخص کے ہلاک ہونے کا واقعہ پیش آیا ہے۔

متوفی کی شناخت 42 سالہ بسوا راج ہیرے مٹھ کے طور پر ہوئی ہے جو گلبرگہ شہر کا ہی ساکن ہے، سنیچر کے روز بیت الخلا میں ان کا پیر پھسل گیا اور انھیں کئی جگہ چوٹیں آئی جس کے سبب بسوا راج وہیں کافی دیر تک تڑپتے رہے۔

بسوا راج کے تین گھنٹے تک بیت الخلأ میں پھنسے ہونے کے بعد بھی جیمس اسپتال میں کسی کی بھی نظر ان پر نہیں پڑی۔

ملازمین کی لاپرواہی سے ان کی موت ہونے پر متوفی کے رشتہ داروں نے اسپتال انتظامیہ کے خلاف سخت ناراضگی کا اظہار کیا ہے۔

بتایا جاتا ہے کہ کورونا وائرس سے متاثر بسواراج تیزی سے صحتیاب ہورہے تھے اور عنقریب ہی انہیں اسپتال سے چھٹی ملنے والی تھی۔