Chandra Singh over Ticket Issue کانگریس سے ٹکٹ نہ ملنے پر چندرا سنگھ ناراض

کانگریس لیڈر اور سابق وزیر اعلیٰ آنجہانی دھرم سنگھ کے داماد چندرا سنگھ نے میڈیا سے بات کرتے ہوئے بیدر جنوب اسمبلی حلقہ سے کانگریس پارٹی کا ٹکٹ نہ ملنے پر اپنی ناراضگی کا اظہار کرتے ہوئے کہا کہ اس کے لیے پارٹی کے اعلیٰ رہنما ذمہ دار ہیں۔

بیدر:ریاست کانگریس کرناٹک میں اسمبلی انتخابات 2023 کے مدنظر سیاسی سرگرمیاں زور و شور سے جاری ہیں۔ تمام سیاسی ووٹرز کی توجہ اپنی اپنی طرف مبذول کرنے کی کوشش میں مصروف ہیں۔ اسی درمیان سیسی جماعتوں کی جانب سے امیدواروں کے ناموں کے اعلان کا سلسلہ بھی جاری ہے۔ اسی درمیان کانگریس لیڈر اور سابق وزیر اعلیٰ آنجہانی دھرم سنگھ کے داماد مسٹر چندرا سنگھ نے میڈیا سے بات کرتے ہوئے بیدر جنوب اسمبلی حلقہ سے کانگریس پارٹی کا ٹکٹ نہ ملنے پر اپنی ناراضگی کا اظہار کرتے ہوئے کہاکہ اس کے لئے پارٹی کے اعلیٰ رہنما ذمہ دار ہیں۔

انہوں نے کہا کہ کانگریسی قائدین نے 2018ء میں مجھ سے وعدہ کیا تھا کہ آئندہ پانچ سال بعد ہونے والے اسمبلی انتخابات میں بیدر جنوب سے مجھے (چندرا سنگھ کو ) ٹکٹ دیں گے۔ لیکن ایسا نہیں کیا گیا۔ اس دفعہ 2023ءانتخابات کے لئے بھی مشہور صنعت کار اور سیاست دان اشوک کھینی کو کانگریس نے ٹکٹ دینے کا اعلان کیا ہے۔

ان کا کہنا ہے کہ 12 سال سے زائد عرصہ سے بیدر جنوب اسمبلی حلقہ میں کانگریس پارٹی کو منظم کرنے کا کام کر رہے ہیں۔ایک ایسے وقت میں جب بیدر جنوب میں کانگریس کا وجود نہیں تھا میں نے اس حلقے میں کام کیا۔اب پارٹی دوسروں کو ٹکٹ دے کر میرے ساتھ ناانصافی کر رہی ہے۔ انہوں نے کہا کہ کانگریس پارٹی کے اس رویے کو میرے چاہنے والے برداشت نہیں کر پا رہے ہیں۔ اس لئے میں ان سے ملاقات کرنے کے بعد ہی کوئی فیصلہ لوں گا کہ مجھے آگے کیا کرنا ہے ۔