Caps And Attar Business Flourish ماہ رمضان میں ٹوپیوں اور عطر کی فروخت عروج پر

ماہ رمضان میں عطر اور ٹوپیوں کے کاروبار میں زبردست اضافہ ہوتا ہے۔ مسلم اکثریتی محلوں میں اس کاروبار سے منسلک لوگوں نے آمدنی میں اضافہ ہونے پر خوشی کا اظہار کیا اور کہا کہ سال کے بارہ مہینوں اسی طرح کاروبار کا سلسلہ چلتا رہا تو کچھ بہتر کیا جا سکتا ہے۔

بیدر: ملک کی دوسری ریاستوں کی طرح کرناٹک ماہ رمضان المبارک کے آخری عشرہ میں عبدالفطر کی تیاریاں زور وشور سے جاری ہیں۔ ضلع بیدر میں بھی ٹوپیاں اور عطر کے کاروبار میں زبردست اضافہ ہوا ہے۔ کاروبار میں تیزی آنے کے سبب دکانداروں میں خوشی پائی جا رہی ہے۔ آغاز کے ساتھ ہی روزہ اور نمازوں کی پابندی کی جاتی ہے جس کے چلتے قرآن مجید، جائے نماز مسواک تسبیحات اور اسلامی ٹوپیوں کی فروخت میں اضافہ ہوتا ہے۔ ضلع بیدر کی مرکز مسجد سے متصل علاقے میں قرآن مجید، تسبیحات ،جائے نماز ، ریحال، 30پارے، نورانی قاعدے، اسلامی کتابوں کے علاوہ مختلف قسم کے پرفیومز اور عطر سرمہ کے ساتھ ساتھ مختلف اقسام کی ٹوپیاں فروخت کی جاتی ہیں۔ ماہ رمضان میں ان سب چیزوں کے کاروبار میں تیزی آئی ہے۔

اس سلسلے میں احمد خان پرفیوم کے مالک احمد خان نے بتایا کہ وہ پچھلے بارہ سال سے یہ کاروبار کر رہے ہیں۔ گزشتہ دو برسوں سے لاک ڈاون کے سبب کاروبار نہ کے برابر رہا لیکن اس مرتبہ اس میں تیزی آئی ہے۔ اس سال اللہ کا فضل و کرم ہے حالات معمول ہیں اور پوری امید ہے کہ کاروبار بہت اچھا ہوگا۔

ایک اور دکاندار الجمیل پرفیوم کے مالک جمیل کا کہنا ہے کہ رمضان المبارک کے مہینے میں اسلامی کتابیں، قرآن مجید کے علاوہ مختلف اقسام کی ٹوپیاں اور نئے دور کی تسبیح، سرموں کی خریداری میں اضافہ ہوا ہے۔ عید سے پہلے ہی شب قدر کے سکیورٹی نوجوان ٹوپیا خرید رہے ہیں۔ کاروبار اچھا چل رہا ہے۔