بنگلور: بچہ مزدوری کے خلاف مہم کا آغاز

طلبا تنظیم کیمپس فرنٹ آف انڈیا کی جانب سے بچہ مزدوری پر روک لگائے جانے اور انہیں تعلیم سے آراستہ کرنے کے لیے قومی سطح پر مہم کا آغاز کیا گیا ہے۔

کورونا لاک ڈاؤن کی وجہ سے ملک میں متعدد مسائل کے کے سر اٹھانے کے ساتھ ساتھ بڑے پیمانے پر "چائلڈ لیبر" کا سنگین مسئلہ بھی پیدا ہو رہا ہے۔ اس سے چھوٹے بچے تعلیم سے دور ہو رہے ہیں۔

حالانکہ عام دنوں میں لاکھوں کی تعداد میں 14 سال سے کم عمر کے بچے بچہ مزدوری کا شکار تھے۔ لیکن لاک ڈاؤن کے بعد اس کی تعداد میں کافی اضافہ دیکھا جارہا ہے۔

ان حالات میں طلبا تنظیم کیمپس فرنٹ آف انڈیا کی جانب سے بچہ مزدوری پر روک لگائے جانے اور انہیں تعلیم سے آراستہ کرنے کے لیے قومی سطح پر مہم کا آغاز کیا گیا ہے۔

اس سلسلے میں بات کرتے ہوئے کیمپس فرنٹ کرناٹک کے نائب صدر ایڈووکیٹ روشن نواز نے بتایا کہ تنظیم کی جانب سے ہر ضلع و تعلقہ کو ایک میمورنڈم پیش کیا جائیگا۔ جس میں حکومت سے چائلڈ لیبر کو ختم کرنے اور انہیں تعلیم دینے کے تئیں سنجیدگی سے اسکیمس تشکیل دینے کا مطالبہ ہوگا۔