بیدر کے پہلے اردو اخبار' بیدر گزٹ' کے 113 سال مکمل

ریاست کرناٹک کے ضلع بیدر میں اردو صحافت کے 113 سال مکمل ہونے پر شاعر و صحافی یوسف رحیم نے میڈیا سے بات کرتے ہوئے کہا کہ صحافت ایک ایسا کام ہے جس سے ہم سوئے ہوئے لوگوں کو بیدار کر سکتے ہیں اور حقدار کو اس کا حق پہنچایا جا سکتا ہے۔

ضلع بیدر میں اردو صحافت کے 113 سال مکمل ہونے پر شاعر و صحافی یوسف رحیم نے کہا کہ سنہ 1907 کو بیدر گزٹ اردو ہفت روزہ اخبار بیدر سے نکالا گیا جس کے ایڈیٹر مہر علی تھے۔ اردو کے اس ہفت روزہ اخبار میں اس زمانے کے اعتبار سے مضامین کے ساتھ خبریں بھی شائع کی جاتی تھیں۔

اس وقت نظام حکومت میں بیدر ضلع بھی شامل تھا، اس کے علاوہ موجودہ ریاست تلنگانہ اور مہاراشٹر کے بھی کئی ضلع نظام حکومت کے صوبوں میں شامل تھے، اس حوالے سے بیدر گزٹ اردو ہفت روزہ اخبار نے شمالی کرناٹک میں اردو کی اہمیت کو اور اردو صحافت کو منور کرنے کا کام کیا ہے۔

یوسف رحیم نے صحافیوں سے متعلق کہا کہ شہری صحافت کے ساتھ ساتھ دیہی صحافت کرنے کی ضرورت ہے، ایسا کرنے سے کسانوں کے مسائل اور دیہات کے مسائل منظرعام پر آئیں گے اور کسانوں کے مسائل کے حل کے علاوہ دیہات میں بنیادی سہولتوں میں بھی بہتری آئیگی۔ انہوں نے نوجوانوں سے صحافت کے شعبے میں بھی آنے کی اپیل کی اور کہا کہ صحافت ایک ایسا کام ہے جس سے ہم سوئے ہوئے لوگوں کو بیدار کر سکتے ہیں اور حقدار کو اس کا حق پہنچا سکتے ہیں۔