کرناٹک: ٹیپو جینتی منسوخ کیے جانے پر یدی یورپا کے خلاف احتجاج

ریاست کرناٹک کے دارالحکومت بینگلورو میں آج شہر کے ٹاون ہال کے سامنے ایس. ڈی. پی آئی پارٹی نے بی. جے. پی حکومت کی جانب سے ٹیپو جینتی منسوخ کیے جانے کے خلاف زبردست احتجاج کیا۔

احتجاج میں متعدد تنظیموں کے ذمہ داران نے شرکت کی اور ریاست میں یدی یورپا حکومت کو آڑے ہاتھوں لیا۔

اس موقع پر ایس. ڈی. پی. آئ کے جنرل سیکرٹری محمد ریاض نے کہا چند ہی روز قبل ریاست کرناٹک میں کانگریس و جے. ڈی. ایس کی نام نہاد سیکولر حکومت کو بی. جے. پی نے گرادیا اور خود اقتدار پر قابض ہوگئے۔

انھوں نے مزید کہا کہ' یدی یورپا نے وزیر اعلیٰ کے طور پر حلف برداری کے فوراً بعد ریاست کی عوام کو پیغام دیا تھا کہ' وہ نفرت کی سیاست نہیں کریں گے لیکن پھر دو ہی دنوں میں ٹیپو جینتی پر روک لگادی، اس سے صاف ظاہر ہوتا ہے کہ آر. ایس. ایس کے زیر قیادت چل رہی بی. جے. پی کے قول اور فعل میں تضاد ہے۔

اس موقع پر دلت رہنما نے ریاست کے وزیراعلی یڈیورپا کے ٹیپو جینتی کے منسوخ کیے جانے پر کہا کہ حکومت کا یہ عمل منافقانہ ہے کہ جب یہ اسمبلی میں اپوزیشن میں تھے تو ٹیپو سلطان کے نام پر کئی پروگرام میں شرکت کی اور ٹیپو کی خوبیاں بھی گِنوائیں۔

انھوں نے مزید کہا کہ جب یدی یورپا نے بی. جے. پی چھوڑ کر کے. جے. پی پارٹی بنائی تھی تب وہ خود شری رنگا پٹن گئے، ٹیپو سلطان کے مقبرے کی زیارت کی. لیکن اب کیا ہوگیا۔

اس احتجاج میں کثیر تعداد میں ایس. ڈی. پی. آی کے کارکنان نے شرکت کی اور حکومت کے رویہ و سنگھ پریوار کے خلاف نعرے بازی کی۔