'نماز عیدالفطر مسجد میں ادا کرنے کی اجازت دی جائے'

ریاست کرناٹک کے دارالحکومت بنگلور میں کانگریس کے سینیئر رہنما اور قانون ساز کونسل کے رکن سی ایم ابراہیم نے وزیراعلیٰ یدی یورپا کو خط لکھ کر درخواست کی ہے کہ مسلمانوں کو عید الفطر کی نماز مساجد میں ادا کرنے کی اجازت دی جائے۔

سی ایم ابراہیم نے اپنے خط میں گزارش کی کہ 'اس سلسلے میں وزیراعلیٰ، محکمہ صحت اور ماہرین صحت سے تبادلہ خیال کریں اور ان کی رائے کے بعد اپنا فیصلہ لیں۔

انہوں نے سوال کیا کہ 'جب شراب خانے کھولے گئے ہیں تو عبادت گاہوں کو کیوں بند رکھا جائے نیز صرف مساجد ہی نہیں بلکہ منادر، چرچ اور گردوارے بھی کھولنے کی جازت دی جائے۔'

اس کے علاوہ سی ایم ابراہیم نے وزیراعظم مودی کی بات کی نقل کرتے ہوئے بتایا کہ ہمیں کورونا وائرس کی وباء کے ساتھ جینا سیکھنا ہوگا کہ یہ فوری طور پر ختم ہونے والی نہیں ہے۔